“Sağlam məktəbli” layihəsi Ağalıda həyata keçirilib

Maarifləndirmə tədbiri Zəngilan rayonunun Ağalı kənd məktəbində təşkil olunub

         Qida Təhlükəsizliyi Agentliyinin mətbuat xidmətindən presstvaz-a daxil olan məlumata əsasən, Agentliyin “Sağlam məktəbli” layihəsi çərçivəsində Zəngilan rayonunun Ağalı kənd tam orta məktəbinin şagirdləri ilə maarifləndirmə tədbiri keçirilib.

Tədbirdə məktəblilərə Şərqi Zəngəzur və Qarabağ regional bölmələrinin mütəxəssisləri tərəfindən Agentliyin fəaliyyət istiqamətləri, eləcə də qida təhlükəsizliyi anlayışı ilə bağlı zəruri məlumatlar verilib.

          Sağlam qidalanma vərdişlərinin böyümə və inkişafda rolu, enerji və zehni fəaliyyətə təsiri, dərsdə diqqət və yaddaş üçün faydası diqqətə çatdırılıb. Həmçinin qida təhlükəsizliyi ilə bağlı xoşagəlməz hallarla qarşılaşdıqda “1003 – Çağrı Mərkəzi”nə müraciət edə biləcəkləri bildirilib.

Daha sonra mövzu ətrafında müzakirələr aparılıb, məktəbliləri maraqlandıran suallar cavablandırılıb və sağlam qidalanmaya dair maarifləndirici bukletlər paylanıb.

          Qeyd edək ki, tədbirin keçirilməsində əsas məqsəd məktəblilər arasında sağlam qidalanma mədəniyyətini formalaşdırmaq, qida təhlükəsizliyi barədə bilikləri artırmaq və düzgün qida vərdişləri aşılamaqdır.

presstvaz   – Azərbaycanın etibarlı informasiya mənbəyi