Azərbaycanın qida təhlükəsizliyi modeli Özbəkistanda tətbiq ediləcək

AQTA-nın təcrübəsindən Özbəkistanda yeni qurumun yaradılmasında istifadə olunacaq

        Azərbaycan Respublikası Qida Təhlükəsizliyi Agentliyinin (AQTA) mətbuat xidmətindən presstvaz-a daxil olan məlumata əsasən, Özbəkistanda qida təhlükəsizliyi sahəsində yaradılacaq yeni dövlət qurumunda Azərbaycanın bu sahədəki təcrübəsindən geniş istifadə ediləcək.

Bu məqsədlə fevralın 9-da AQTA nümayəndə heyətinin Özbəkistan Respublikasına işgüzar səfəri başlayıb.

        Səfərin ilk günü keçirilən görüşdə Azərbaycanda qida təhlükəsizliyi sahəsində formalaşdırılmış vahid idarəetmə sistemi, qida təhlükəsizliyinə risk əsaslı yanaşma metodları, hüquqi bazanın yaradılması, böhran vəziyyətlərində idarəetmə mexanizmləri, sürətli xəbərdarlıq sistemlərinin əhəmiyyəti, yoxlama-nəzarət tədbirləri, idxal-ixrac prosedurları və digər məsələlər ətraflı müzakirə olunub.

Bildirilib ki, Azərbaycanda tətbiq olunan dövlət idarəetmə modelləri yüksək qiymətləndirilir. Xüsusilə qida təhlükəsizliyi sahəsində Azərbaycanın əldə etdiyi təcrübəyə böyük maraq göstərilir.

       Qeyd edək ki, Azərbaycan nümayəndə heyətinin Özbəkistanda digər görüşlərinin və təqdimatlarının keçirilməsi də planlaşdırılır.

 presstvaz   – Azərbaycanın etibarlı informasiya mənbəyi