Livanda son həftələrdə ikinci dəfə bina çökdü: İtki sayı artır

Bazar günü Livanın şimal bölgəsində yerləşən Tripoli şəhərində yaşayış binasının uçması nəticəsində həyatını itirənlərin sayı doqquz nəfərə yüksəlib. Qeyd edək ki, bu, son bir neçə həftə ərzində ölkədə qeydə alınan analoji ikinci hadisədir.

presstvaz-ın məlumatına görə, rəsmi Milli Xəbər Agentliyi (MXA) hadisənin Tripolinin ən aztəminatlı sakinlərinin yaşadığı Bab əl-Tabbane rayonunda baş verdiyini bildirib.

Axtarış-xilasetmə qrupları dağıntılar altında qalan cəsədlərin və sağ qalanların tapılması istiqamətində işləri davam etdirirlər. Əlavə uçqun təhlükəsini nəzərə alan təhlükəsizlik orqanları ətrafdakı tikililərdə yaşayan sakinləri təxliyə ediblər. Xilasedicilər gecə saatlarına qədər dağıntı zonasında fəaliyyət göstəriblər, ərazidə təcili tibbi yardım briqadaları hazır vəziyyətdə saxlanılıb.

Livan Mülki Müdafiə İdarəsinin rəhbəri İmad Xreiş yerli mətbuata açıqlamasında qeyd edib ki, faciə nəticəsində doqquz sakin dünyasını dəyişib, altı nəfər isə xəsarət alaraq xəstəxanaya yerləşdirilib. Məlumata görə, iki blokdan ibarət olan qəzalı binanın hər blokunda altı mənzil mövcud idi. Sakinlər hadisə baş verən an binada təqribən 22 nəfərin olduğunu bildiriblər.