Messi “Qalatasaray”a gələ bilər – İddia

Futbol şərhçisi Levent Tüzemen Lionel Messinin xüsusi bir layihə çərçivəsində “Qalatasaray”a təklif edildiyini bildirib. Tüzemenin iddiasına görə, dünya ulduzu üçün “sarı-qırmızılı” kluba ABŞ-dən diqqətçəkən bir təklif daxil olub.

presstvaz xəbər verir ki, bu barədə “Haber Global” məlumat yayıb.

Levent Tüzemen açıqlamasında “Qalatasaray” rəhbərliyinin də bu əlaqəni təsdiqlədiyini, Messinin isə yalnız İstanbulda oynamaq şərti ilə qısamüddətli bir planı nəzərdən keçirdiyini deyib. O qeyd edib ki, argentinalı ulduz Amerika Liqasında oyun tempinin onun üçün yüksək olduğunu düşünür və Dünya Çempionatı 2026-ya zədə almadan hazırlaşmaq istəyir.

Məlumata görə, Messi səfər oyunlarında iştirak etməmək şərti ilə təxminən dörd ay ərzində 12 matçda forma geyinə bilər. Həmçinin “Qalatasaray”ın Türkiyə Kubokunun finalına yüksələcəyi təqdirdə, həmin qarşılaşmanın da Messinin planlaşdırılan oyunlarına daxil edilə biləcəyi müzakirə olunur.

Levent Tüzemen bunun rəsmi razılaşma olmadığını, sadəcə kluba daxil olan bir təklifdən ibarət olduğunu vurğulayıb. Hazırda təklifin qiymətləndirildiyi bildirilir. Qeyd edilir ki, “Inter Mayami”də çıxış edən Messi liqa fasiləsi dövründə fiziki formasını qorumağı hədəfləyir.