Xəzər rayonunda evlərdən məişət əşyaları oğurlayan şəxs saxlanılıb

Yasamalda oğurluq edən iki nəfər polis tərəfindən tutulub

        Daxili İşlər Nazirliyinin rəsmi mənbələrindən presstvaz-a daxil olan məlumata əsasən,
Xəzər rayonu ərazisində naməlum şəxs üç fərdi evə daxil olaraq ümumilikdə 12 650 manat dəyərində məişət əşyalarını oğurlayıb.

Xəzər Rayon Polis İdarəsinin 1-ci Polis Şöbəsi əməkdaşlarının keçirdikləri tədbirlərlə əməlləri törətməkdə şübhəli bilinən, əvvəllər məhkum olunmuş, axtarışda olan 37 yaşlı R.Dəmirov saxlanılıb. Araşdırma zamanı onun oğurluq etmək niyyətində olduğu evləri əvvəlcədən müşahidə etdiyi və talama cinayətlərini əsasən gecə saatlarında planlaşdıraraq həyata keçirdiyi müəyyən edilib. Həmçinin R.Dəmirovun analoji üsulla Sabunçu rayonu ərazisində daha iki evdən 9 000 manat dəyərində məişət əşyaları oğurladığı məlum olub.

        Bununla yanaşı, Yasamal rayonu ərazisində yerləşən evlərin birindən 708 manat nağd pul, mobil telefon və bank kartının oğurlanması barədə polisə müraciət daxil olub. Yasamal Rayon Polis İdarəsinin 26-cı Polis Şöbəsinin əməkdaşlarının keçirdikləri tədbirlərlə əməli törətməkdə şübhəli bilinən 26 yaşlı L.Xudaverdiyeva müəyyən edilərək saxlanılıb.

Rayon ərazisində qeydə alınan digər bir oğurluq hadisəsi zamanı isə itirilmiş bank kartını taparaq 495 manat məbləğində alış-veriş edən 47 yaşlı P.Sultanova da polis əməkdaşları tərəfindən saxlanılıb.

       Faktlarla bağlı araşdırmalar davam etdirilir.

presstvaz  – Azərbaycanın etibarlı informasiya mənbəyi