36 kiloqram narkotik vasitə qanunsuz dövriyyədən çıxarıldı

Nəsimi rayonunda narkotiklərə qarşı əməliyyat keçirildi

Daxili İşlər Nazirliyinin rəsmi mənbələrindən presstvaz-a daxil olan məlumata əsasən, Nəsimi Rayon Polis İdarəsinin əməkdaşları tərəfindən narkotik vasitələrin qanunsuz dövriyyəsinə qarşı keçirilən növbəti əməliyyatlar zamanı 38 yaşlı Azad Fərəcov və əvvəllər məhkum olunmuş 41 yaşlı Mikayıl Səlimov saxlanılıb.

Araşdırmalarla müəyyən edilib ki, A. Fərəcovdan 3 kiloqram 175 qram tiryək, 7 kiloqram 340 qram marixuana və 800 ədəd metadon həbi, M. Səlimovdan isə 2 kiloqram 10 qram heroin və metamfetamin, eləcə də 8 kiloqram 75 qram marixuana aşkar edilərək götürülüb. Sonuncu əməliyyat zamanı ümumilikdə 20 kiloqram 637 qram narkotik vasitə qanunsuz dövriyyədən çıxarılıb.

Saxlanılan şəxslər ifadələrində narkotik vasitələri sosial şəbəkələrdə tanış olduqları, şəxsiyyətləri istintaqla araşdırılan İran vətəndaşları vasitəsilə əldə etdiklərini və paytaxt ərazisində müxtəlif ünvanlara çatdırmağı planlaşdırdıqlarını bildiriblər.

Faktlarla bağlı cinayət işləri başlanılıb. A. Fərəcov və M. Səlimov barəsində məhkəmənin qərarı ilə həbs qətimkan tədbiri seçilib.

Qeyd edək ki, cari ilin əvvəlindən Nəsimi Rayon Polis İdarəsinin əməkdaşları tərəfindən ümumilikdə 36 kiloqram müxtəlif növ narkotik vasitə qanunsuz dövriyyədən çıxarılıb.

presstvaz   – Azərbaycanın etibarlı informasiya mənbəyi