Avropa liderləri qrup çatında Trampın siyasətini müzakirə edirlər

Avropa liderləri qrup çatında söhbət edirlər və ABŞ Prezidenti Donald Trampın xarici siyasətini müzakirə edirlər.

presstvaz-ın xəbərinə görə, bu barədə Avropanın “Politico” nəşri mənbəyə istinadən məlumat verib.

Məlumata görə, Britaniyanın Baş naziri Kir Starmer, Fransa Prezidenti Emmanuel Makron, Almaniya Kansleri Fridrix Merts, Avropa Komissiyasının sədri Ursula fon der Lyayen, Finlandiya Prezidenti Aleksandr Stubb və İtaliyanın Baş naziri Corcia Meloni tez-tez, çox vaxt eyni qrup çatında fikir mübadiləsi aparırlar.

“Hadisələr sürətlə irəlilədikdə və koordinasiya çətin olduqda, bu qrup çatı çox effektiv olur. Bu, şəxsi münasibətlər və onların əhəmiyyəti haqqında çox şey deyir”, – deyə mənbə “Politico”ya bildirib.

Nəşrin məlumatına görə, Ukrayna üzrə “könüllülər koalisiyası” əsasında yaradılan qeyri-rəsmi birlik bəzi Avropa liderlərinin 2025-ci ilin avqust ayında Ukrayna Prezidenti Volodimir Zelenski ilə Vaşinqtona səfərinin şərəfinə “Vaşinqton qrupu” adlandırılıb. Zelenski də çata daxil edilib və yazışmalarda iştirak edir.

“Könüllülər koalisiyası əvvəlcə Ukrayna məsələləri ilə məşğul olurdu. Lakin koalisiya paytaxtlarda əsas fiqurlar arasında çox sıx əlaqələr yaratdı. Onlar etimadı və birlikdə işləmək bacarığını gücləndirdilər. Onlar bir-birini şəxsən tanıyırlar və onlar üçün ünsiyyət qurmaq və yazışmaq asandır”, – deyə nəşrin adı çəkilməyən mənbəsi olan diplomat bildirib.

Qeyd olunur ki, ABŞ NATO və Avropa təhlükəsizliyinə dəstəyindən imtina edərsə, bu format perspektivdə yeni hərbi alyansın əsasını təşkil edə bilər. Belə bir alyans Vaşinqtonla əməkdaşlığı istisna etməyəcək, lakin artıq bunu məcburiyyət kimi qəbul etməyi dayandıracaq.