Xüsusi Rabitə və İnformasiya Təhlükəsizliyi Dövlət Xidmətində 20 Yanvar faciəsi qurbanlarının xatirəsi anılıb

20 Yanvar faciəsinin növbəti ildönümü ilə əlaqədar Xüsusi Rabitə və İnformasiya Təhlükəsizliyi Dövlət Xidmətinin (XRİTDX) rəisi general-leytenant İlqar Musayev və xidmətin şəxsi heyəti Şəhidlər xiyabanını ziyarət edib.

presstvaz xəbər verir ki, bu barədə XRİTDX məlumat yayıb.

Azərbaycanın müstəqilliyi, suverenliyi və ərazi bütövlüyü uğrunda canlarından keçmiş Vətən övladlarının müqəddəs xatirəsi dərin ehtiramla yad edilib, məzarları üzərinə qərənfillər düzülüb. XRİTDX adından “Əbədi məşəl” abidə-kompleksinin önünə əklil qoyulub.

Daha sonra xidmətin inzibati binasında anım tədbiri keçirilib. Tədbir Azərbaycanın azadlığı və ərazi bütövlüyü uğrunda şəhid olmuş oğul və qızlarımızın əziz xatirəsinin bir dəqiqəlik sükutla yad edilməsi ilə başlayıb. Tədbirdə çıxış edən XRİTDX-nin rəis müavini general-mayor Allahverən İsmayılov 20 Yanvar hadisələrinin xalqımızın müstəqillik tarixində tutduğu müstəsna yeri vurğulayıb, şəhidlərin xatirəsinin daim uca tutulmasının vacibliyini qeyd edib.

Anım tədbirinin sonunda 20 Yanvar faciəsinə həsr olunmuş sənədli film nümayiş etdirilib.