“Haber Global” Hələbdə terrorçuların gizli tunellərinin görüntülərini yaydı

“Haber Global” Hələb şəhərinin terrorçulardan təmizlənmiş Şeyx Maqsud və Əşrəfiyyə məhəllələrində son vəziyyəti paylaşıb.

presstvaz-ın xəbərinə görə, “Haber Global” “YouTube” kanalı bununla bağlı videosüjet dərc edib.

Telekanal əməkdaşları terror təşkilatının geridə qoyduğu gizli tunellərə və obyektlərə giriblər.

“Suriyanın Hələb şəhərinin Şeyx Maqsud və Əşrəfiyyə məhəllələri YPG/SDQ (Suriya Demokratik Qüvvələri) terrorçularından təmizlənib. Ancaq Suriya ordusu terrorçuların qoyub getdiyi tələlərin aşkarlanması və zərərsizləşdirilməsi işlərini davam etdirir. Terror təşkilatının yerləşdiyi obyektlərdən biri də Şeyx Maqsud məhəlləsindəki Yasin xəstəxanası olub ki, terrorçular xəstəxananın hər otağını partlayıcı maddələrlə doldurublar.

Terror təşkilatının istifadə etdiyi obyektlərdən biri də Şeyx Maqsud məhəlləsindəki Həsən məscidi olub. Terrorçular məscidi hərbi bazaya çeviriblər.

Terrorçuların nəzarətlərindəki bir çox yerlər kimi Şeyx Maqsudda da gizli tunellər inşa etdiyi ortaya çıxıb. Həmin tunellər terrorçuların yerləşdiyi Şeyx Məqsud və Əşrəfiyyə məhəllələrini birləşdirir. Şeyx Maqsuddan tunelə girən terrorçular Əşrəfiyyədən çıxa bilirdilər”, – deyə materialda bildirilir.