Yüksəkvəzifəli şəxslərin xuliqanliqda təqsirləndirilən qohumu psixiatriya xəstəxanasına göndərildi

Prezident Administrasiyasının Hərbi məsələlər şöbəsinin sabiq rəhbəri, səfir Məhərrəm Əliyev və Suraxanı Rayon İcra Hakimiyyətinin başçısı Adil Əliyevin mühakimə olunan yaxın qohumu İsa Əzizov barəsində məhkəmə qərarı elan edilib.

presstvaz-ın məlumatına görə, Bakı Ağır Cinayətlər Məhkəməsinin hakimi Roman Ələkbərlinin sədrliyi ilə keçirilən iclasda İsa Əzizovun hadisəni törədərkən anlaqsız vəziyyətdə olduğu nəzərə alınaraq, məhkəmə onu ümumi tipli psixiatriya xəstəxanasında məcburi müalicəyə göndərib.

Məhkəmə istintaqı zamanı bilinib ki, İsa Əzizov 2025-ci ilin sentyabr ayında “Sea Breeze” istirahət mərkəzində xuliqanlıq edib. İlkin mərhələdə ona qarşı Cinayət Məcəlləsinin 221-ci (xuliqanlıq) maddəsi ilə iş açılsa da, istintaq dərinləşdikcə ittihamlar ağırlaşıb və əməlləri Cinayət Məcəlləsinin 126.2.1-ci (sağlamlığa qəsdən ağır zərər vurma) və 234.1-ci (satış məqsədi olmadan narkotik maddələrin saxlanılması) maddələri ilə yenidən tövsif edilib.

Araşdırmalar zamanı müəyyən olunub ki, bu, İsa Əzizovun ilk qanunsuz əməli deyil. Belə ki, o, daha əvvəl Bakıda yanacaqdoldurma məntəqəsinin mühafizəçisini döydüyünə görə cinayət məsuliyyətinə cəlb edilərək həbs cəzası alıb. Azadlığa çıxdıqdan sonra isə 2019-cu ildə paytaxtın mərkəzində baş verən silahlı hadisədə fəal iştirak edib. Həmin insidentdə polis əməkdaşlarının təslim olmaq çağırışlarına qarşı İsa Əzizov bıçaqla təhlükəli müqavimət göstərib.

Məhkəmə psixiatrik ekspertizanın rəyinə əsaslanaraq İsa Əzizovun məcburi müalicəyə ciddi ehtiyacı olduğu qənaətinə gəlib.