İranda böhran dərinləşir: ABŞ Dövlət Departamentindən təcili xəbərdarlıq

ABŞ Dövlət Departamenti İranda etiraz dalğasının təhlükəli həddə çatdığını rəsmən bəyan edib.

Departamentin təcili açıqlamasında vurğulanıb ki, İran rejimi sərt təhlükəsizlik tədbirlərinə əl atıb – küçələrdə nəzarət güclənib, əsas yollar bağlanıb, ictimai nəqliyyat sistemində ciddi fasilələr yaranıb və əhalinin internet əlaqəsi kəskin şəkildə məhdudlaşdırılıb.

presstvaz-ın məlumatına görə, bu xəbərdarlıq ABŞ-nin İrandakı virtual səfirliyinin rəsmi səhifəsində dərc edilib. Birləşmiş Ştatlar öz vətəndaşlarına uzunmüddətli internet kəsintilərinə dərhal hazırlaşmağı və alternativ kommunikasiya üsulları təşkil etməyi tövsiyə edir.

Həmçinin vətəndaşlara təhlükəsiz fürsət yaranan kimi İranı qonşu Türkiyə və ya Ermənistan ərazisi vasitəsilə quru yolla tərk etmələri təkidlə məsləhət görülür. ABŞ Dövlət Departamentinin yaydığı bəyanatda vurğulanır ki, aviaşirkətlər İrana və bu ölkədən olan reyslərini sürətlə məhdudlaşdırır və ya tamamilə ləğv edirlər. Bir sıra hava daşıyıcıları ən azı 16 yanvara qədər bütün uçuşlarını dayandırıblar. Bununla əlaqədar beynəlxalq uçuş imkanları qeyri-sabit vəziyyətdə qalır və istənilən an xəbərdarlıqsız dəyişdirilə bilər.