Biri evdə, digəri xəstəxanada doğulan əkizlərlə bağlı ATADAN AÇIQLAMA

Nizami rayonu ərazisində çağırışa gedən təcili tibbi yardım briqadası ev şəraitində doğuş prosesini həyata keçirib.

Qeyd edilib ki, çağırış ünvanında təcili tibbi yardım briqadası tərəfindən 37 həftəlik əkiz hamiləliyi olan qadının doğuşu idarə olunub.

Baku TV-nin məlumatına görə, doğuşun ilkin mərhələsi birbaşa yaşayış ünvanında baş verib, daha sonra proses təcili tibbi yardım avtomobilində nəzarət altında davam etdirilib.

Briqada tərəfindən ana və yenidoğulmuş körpəyə (oğlan) zəruri ilkin tibbi yardım göstərildikdən sonra onlar müvafiq tibb müəssisəsinə təxliyə olunublar. Digər körpənin sağrı gəlişi müşahidə edildiyindən doğuş prosesi tibb müəssisəsində davam etdirilib və ikinci körpə (qız) dünyaya gəlib.

Əkizlərin atası körpələrin son durumunu açıqlayıb. “Biri qız, biri oğlandır. Hələlik yaşayıb-yaşamayacağını bilmək olmaz. Əkizlərdən biri küvəzdədir. Biri yaxşıdır, digərinin vəziyyəti bir az ağırdır”, – deyə o qeyd edib.