Türkiyədə məşhurlara qarşı əməliyyat genişlənir: Daha bir media şirkətinin rəhbəri saxlanıldı

Türkiyədə İstanbul Baş Prokurorluğu tərəfindən aparılan istintaq çərçivəsində şou-biznes dünyasının tanınmış simalarından biri olan, “Mahzen Media” şirkətinin sahibi Tolqa Aykut saxlanılıb.

Bu barədə presstvaz “TGRT Haber” nəşrinə istinadən xəbər verir.

Məlumata görə, bu əməliyyat son zamanlar Türkiyə gündəmini silkələyən, İstanbul Baş Prokurorluğu tərəfindən koordinasiya edilən və əyləncə dünyasının tanınmış simalarına yönəlmiş narkotikə qarşı istintaq prosesi çərçivəsində aparılır.

Bildirilir ki, Tolqa Aykut İstanbul jandarm qrupları tərəfindən öz evində saxlanılıb.

İstintaqda diqqət çəkən məqamlardan biri odur ki, Aykutun nəzarət altında alınması keçmiş “Habertürk” telekanalının baş redaktoru Mehmet Akif Ersoyun bu yaxınlarda saxlanılmasından qısa müddət sonra baş verib. Etibarlı mənbələrin məlumatına görə, bu, hər iki şəxsin saxlanılmasına səbəb olan hadisələr seriyası ilə əlaqəli ola bilər.

Tolqa Aykut ilkin prosedurlar başa çatdıqdan sonra Respublika Prokurorluğuna göndəriləcək. Həmçinin istintaqın məxfilik prinsipi çərçivəsində aparıldığı və yaxın günlərdə yeni həbslərin də baş verə biləcəyi qeyd edilir.

Xatırladaq ki, daha əvvəl Türkiyənin “Habertürk” telekanalının baş redaktoru Mehmet Akif Ersoy “Narkotik maddələrin istifadəsi üçün yer və imkan təmin etmək” və “Ətrafındakı qadınları cinsi əlaqəyə məcbur edərək maddi mənfəət əldə etmək” ittihamları üzrə saxlanılıb. O, prokurorluğa verdiyi ifadəsində barəsindəki ittihamları rədd edib. Ersoy, həmçinin bu hadisələr fonunda vəzifəsindən də azad edilib.