Azərbaycanda işçilərin işdən azad olunması qaydalarına dəyişiklik edilir

Azərbaycanda işçilərin işdən azad olunması qaydalarına dəyişiklik edilir.

presstvaz xəbər verir ki, sözügedən məsələ parlamentin Regonal siyasət komitəsinin bugünkü iclasında bir sıra qanunlara təklif edilən dəyişiklik layihəsində əksini tapıb.

Belə ki, işçi icbari tibbi müayinə olunmaqdan boyun qaçırdıqda və ya keçirilmiş müayinələrin nəticələrinə əsasən həkim komissiyalarının verdikləri tövsiyələri yerinə yetirmədikdə, habelə icbari tibbi müayinə ilə bağlı verilmiş tibbi rəydə əmək funksiyalarının yerinə yetirilməsinə əks göstərişlər aşkar edildikdə işdən azad edilə bilər.

Həmçinin insanın immunçatışmazlığı virusu (İİV) ilə yaşayan şəxslərin işləməsinə yol verilməyən peşə və vəzifələrdə işləyən işçi vaxtaşırı müvafiq mütləq tibbi müayinədən imtina etdikdə, müəyyən olunmuş qaydada əməyin mühafizəsi üzrə təlimdə iştirak etməkdən və biliyinin yoxlanılmasından boyun qaçırdıqda, əmək vəzifələrinin pozulması halının araşdırılmasına maneçilik törətdikdə işdən çıxarıla bilər.

Bundan başqa, işçinin işdən kənar edilməsi hər bir konkret halda müvafiq sübutlar (həkim rəyi, işçilərin izahatları, arayışlar və digər rəsmi sənədlər) toplanılaraq sənədləşdirilməlidir. İşəgötürən işçinin işdən kənar edilməsi üçün əsas olan hal aradan qaldırılanadək işçini işdən kənarlaşdıra bilər.

İşçinin işdən kənarlaşdırıldığı müddət hər bir konkret halın xarakterinə, müvafiq dövrdə həmin halın aradan qalxmasına və ya davam etməsi ondan asılı olan hallarla bağlı işçinin etdiyi hərəkətlərə (hərəkətsizliklərə) uyğun olaraq işəgötürən tərəfindən müəyyən edilir.

İşəgötürən işçinin işdən kənarlaşdırılması barədə əmrini (sərəncamını, qərarını) vaxtından əvvəl ləğv edə bilər.