Uşakov: “Rusiya ilə ABŞ arasında sülh planı ciddi müzakirə olunmayıb”

“Əbu-Dabidə Rusiya ilə ABŞ arasında sülh planı ilə bağlı hələ ciddi şəkildə müzakirə aparılmayıb”.

presstvaz-ın xəbərinə görə, bu sözləri Rusiya prezidentinin köməkçisi Yuri Uşakov “Rossiya 1” telekanalının jurnalisti Pavel Zarubinə müsahibəsində deyib. Müsahibə Zarubinin “Telegram” kanalına yayımlanıb.

“Əbu-Dabidə sülh planı müzakirə olunmayıb. Sülh planı, ümumiyyətlə, detallı şəkildə hələ heç kimlə müzakirə olunmayıb. Biz onu görmüşük, bizə onu veriblər, amma müzakirələr hələ baş tutmayıb. Əlimizdə sənəd var, amma rəsmi deyil. Biz onu heç kimlə müzakirə etməmişik, çünki bu, həqiqətən ciddi şəkildə təhlil tələb edir, bir çox məqamların ekspertlər arasında xüsusi müzakirə olunmasına ehtiyac var”, – deyə Uşakov Əbu-Dabidəki danışıqların yekununa görə sülh planı haqqında hansısa təsəvvürün formalaşıb-formalaşmayacağına dair jurnalistin sualına cavabında bildirib.

O, həmçinin Birləşmiş Ərəb Əmirliklərinin (BƏƏ) Əbu-Dabi şəhərində Rusiya və Ukrayna xüsusi xidmət orqanlarının ciddi işlər apardığını, mütəmadi olaraq görüşərək, olduqca həssas məsələlər, o cümlədən əsir mübadiləsi ilə bağlı müzakirələr apardıqlarını qeyd edib.

Qeyd edək ki, daha əvvəl ABŞ, Ukrayna və Rusiyanın Əbu-Dabidə qapalı danışıqlar apardıqlarına dair KİV-də məlumatlar yayılmışdı.