ABŞ-də jurnalistə sui-qəsdi “Quli”nin adamlarına SEPAH sifariş edibmiş: Məhkəmə işi

Manhetten Federal Məhkəməsində (ABŞ) kriminal aləmin üzvləri Rafet Əmirov və Polad Ömərova 25 il həbs cəzası kəsilib.

presstvaz “Teleqraf”a istinadən xəbər verir ki, mart ayında onlar iranəsilli amerikalı jurnalist və hüquq müdafiəçisi Masi Alinejadın həyatına sui-qəsd təşkil edilməsində günahkar biliniblər.

Nyu-York Cənub Dairəsinin federal prokurorluğu 46 yaşlı Rafet Əmirov və 41 yaşlı Polad Ömərovu məşhur “qanuni oğru”, 2020-ci ildə Antalyada öz mühafizəçisi tərəfindən öldürülmüş Nadir Səlifovun (“Lotu Quli”) rəhbərliyi altında fəaliyyət göstərən “rus mafiyası”nın üzvləri kimi təsvir edib.

İttiham aktına görə, 2022-ci ilin iyul ayının sonu üçün planlaşdırılan, lakin icraçı Xalid Mehdiyevin səriştəsizliyi səbəbindən baş tutmayan Alinejada qarşı sui-qəsd cəhdi İranın İslam İnqilabı Keşikçiləri Korpusu (SEPAH) tərəfindən sifariş edilib və jurnalistin qətlə yetirilməsi üçün yarım milyon dollar ayrılıb.

Prokurorların sözlərinə görə, Gürcüstan vətəndaşı Polad Ömərov, həm Rusiya, həm də Azərbaycan vətəndaşlığı olan Rafet Əmirov bu sifarişə qismən pul xətrinə, eyni zamanda, “Quli”nin ölümündən sonra qruplaşma daxilində onun varisliyi uğrunda gedən çəkişmədə üstünlük qazanmaq ümidi ilə girişiblər.

Prokuror kriminal ünsürün “taclanması”nı tanımayıb

Rafet Əmirov vaxtilə məhz Nadir Səlifovun özü tərəfindən “qanuni oğru” kimi taclandırılıb. Polad Ömərov isə Nadir Səlifovun yaxın qohumudur. O da “Quli” tərəfindən taclandırıldığını iddia etsə də, qruplaşmanın digər üzvləri bunu təkzib ediblər. Eyni zamanda, Manhetten prokurorluğu da onu “qanuni oğru” kimi tanımayıb.

2023-cü ildə Çexiyada saxlanılan və bir il sonra ABŞ-yə ekstradisiya olunan Rafet Əmirov istintaqla əməkdaşlıqdan imtina edib.

Məlumata görə, Özbəkistandan təhvil verilən Polad Ömərov isə üzərinə qoyulan ittihamları müzakirə etməkdən boyun qaçırıb. Amma prokurorların dediyinə görə, ABŞ-dən kənarda keçdiyi kriminal karyera barədə sorğu-sual zamanı fəxrlə danışıb.

İcraçı Xalid Mehdiyev (“Əhmədli Xalid”) isə hazırda 27 yaşındadır. Həbs edildiyi zaman əvvəlcə danışmaqdan imtina edib. Daha sonra fikrini dəyişib, istintaqla əməkdaşlığı qəbul edib və mart ayında hakim Kolin Makmahonun sədrliyi ilə keçirilən məhkəmə prosesində üç dəfə ifadə verib.

Xatırladaq ki, hakim Makmahon ABŞ-nin sabiq prezidenti Bill Klinton tərəfindən təyin olunub.

Hakim cəzanı yarıyadək azaltdı

Prokurorluq Rafet Əmirov və Polad Ömərovun hər birinin 55 il müddətinə azadlıqdan məhrum edilməsini təklif edib. Hakim isə hər iki təqsirləndirilən şəxsi 25 il müddətinə azadlıqdan məhrum edib.

Əgər onlar həbsxanada nizam-intizamlı olsalar, təxminən, 20 il cəza çəkəcəklər. ABŞ federal sistemində 1985-ci ildən bəri şərti azadlıq yoxdur. Amma məhbusların cəzası yaxşı davranışa görə, adətən, 15% azaldılır.

“Çalışdım ki, gələcəkdə “qanuni oğru” olmağa layiq görülüm”

Rafet Əmirov son illər İranda yaşayıb. Polad Ömərovla o əlaqə saxlayıb, Ömərov isə jurnalist Alinejadın öldürülməsi tapşırığını Yonkersdə yaşayan, “U Peppino” adlı pizza restoranında menecer işləyən Xalid Mehdiyevə verib.

Polad Ömərovun vəkili Elena Fest X.Mehdiyevlə çarpaz sorğu-sual keçirib.

O da məlum olub ki, Mehdiyev ABŞ-də ola-ola internet vasitəsilə Ukraynada törədilən bir oğurluq əməliyyatını idarə edib.

“Demək, siz həm beynəlxalq oğurluğu koordinasiya edir, həm də pizza restoranında işləyirdiniz?” – deyə Fest soruşub.

Xalid Mehdiyev hər iki işi eyni vaxtda görməyin məsuliyyət tələb etdiyini etiraf edib:

“Qruplaşma rəhbərlərində yaxşı təəssürat yaratmağa çalışdım ki, gələcəkdə “qanuni oğru” olmağa layiq görülüm”.

“Quli”nin ölümündən sonra nə baş verdi?

Nadir Səlifovun (“Quli”) ölümündən sonra Xalid Mehdiyev reketlik etməyə davam edib. Əvvəlcə “Quli”nin qardaşı Namik Səlifovun (“Namik Bakinski”) adından istifadə edirmiş, daha sonra ondan ayrılıb. Polad Ömərovla birgə xaricdən “WhatsApp” vasitəsilə verdiyi tapşırıqlarla işləməyə başlayıb.

Məsələn, Bruklində bir ərzaq mağazasının sahibini “nəzarət”ə götürüblər. Xalid Mehdiyevin maşınını mağazanın dayanacağında gülləbaran edib, onun “Range Rover” markalı avtomobilini yandırıb.