Hibrid avtomobillərin davamlılıq reytinqi açıqlanıb

Almaniyanın ADAC avtomobil klubunun apardığı geniş araşdırmanın nəticələri dərc olunub. Tədqiqat çərçivəsində mütəxəssislər müxtəlif markalara məxsus hibrid avtomobillərin akkumulyatorlarının davamlılığını müqayisə ediblər.

presstvaz electrek.co-ya istinadən xəbər verir ki, ADAC analitikləri Avstriyanın AVILOO şirkəti ilə birlikdə altı il ərzində müxtəlif modellər üzrə toplanmış 28 500-dən çox akkumulyatorun vəziyyətinin ölçülərini təhlil ediblər.

Gözlənilməz şəkildə məlum olub ki, avtomobil markası akkumulyatorun xidmət müddətini müəyyən edən əsas amillərdən biridir. Orta hesabla əksər hibridlər 200 min km yürüşdən sonra tutumlarının 80%-dən çoxunu qoruyub saxlayır, lakin markalar arasında ciddi fərqlər aşkar edilib.

Ən stabil nəticəni “Mercedes-Benz” avtomobilləri göstərib, onların akkumulyatorları 200 min km-dən sonra belə, demək olar ki, dəyişməz performans nümayiş etdirir.

“Mitsubishi” isə əksinə, istismarın erkən mərhələlərində tutumun nəzərəçarpacaq dərəcədə azalması ilə seçilib, zaman keçdikcə deqradasiya bir qədər ləngisə də, ilkin itkilər yüksək olur.

BMW modellərində istifadə rejimindən asılı olaraq böyük dəyişkənlik müşahidə olunub. “Ford” akkumulyatorlarında tutumun sürətli azalması qeydə alınıb. “Volkswagen” və “Volvo” avtomobilləri isə orta səviyyəli nəticələr göstəriblər.