Ötən il İranda hava çirklənməsindən 60 minə yaxın insan ölüb

İran Səhiyyə Nazirliyinin məlumatına görə, 2024-cü ildə ölkədə hava çirkliliyi səbəbindən təxminən 58 975 nəfər həyatını itirib.

presstvaz bu barədə “Azad İran” “Telegram” kanalı xəbər verir.

Bildirilir ki, bu, gündə orta hesabla 161, saatda isə təxminən 7 ölüm deməkdir. Söhbət xüsusilə havada olan və ağciyərlərə birbaşa daxil ola biləcək dərəcədə xırda – 2,5 mikrondan kiçik toz və çirk hissəciklərindən gedir.

Rəsmilərin sözlərinə görə, bu hissəciklərin səviyyəsi İranın böyük şəhərlərində beynəlxalq səviyyədə icazə verilən normanı bir neçə dəfə üstələyir. Ölkədə 30 yaşdan yuxarı vətəndaşlar arasında baş verən bu ölümlərin 23%-i ürəyin işemik xəstəliyi, 21%-i ağciyər xərçəngi, 17%-i xroniki ağciyər xəstəlikləri, 15%-i insult və digərləri müxtəlif tənəffüs yolu infeksiyaları ilə əlaqələndirilir.

Havanın çirklənməsinin iqtisadi təsirləri də ağırdır: 2024-cü ildə bu səbəbdən ölkə iqtisadiyyatının vurduğu zərərin təxminən 17.2 milyard dollar olduğu bildirilib ki, bu da gündə 47 milyon dollarlıq itki deməkdir.