Anar Nərimanov: “Peyk təsvirləri iqtisadiyyata həm birbaşa, həm də dolayı təsir göstərir”

“Azərbaycanda Milli Məkan Məlumatları İnfrastrukturunun qurulması ölkə iqtisadiyyatına birbaşa – yəni ümumi daxili məhsula (ÜDM) 1-1,5 faiz müsbət təsir göstərir”.

presstvaz xəbər verir ki, bunu İqtisadiyyat Nazirliyinin Rəqəmsal İdarəetmə şöbəsinin müdiri Anar Nərimanov “Kosmosdan gələn imkanlar: Kosmik müşahidəmizin sosial-iqtisadi inkişafa töhfəsinin 10 ili” adlı tədbirdə deyib.

Onun sözlərinə görə, peyk təsvirləri iqtisadiyyata həm birbaşa, həm də dolayı təsir göstərir:

“Bu təsiri bir çox aspektlərdən qiymətləndirmək mümkündür. Məsələn, Milli Məkan Məlumatları İnfrastrukturu layihəsini qeyd edə bilərəm. Araşdırmalar göstərir ki, bu infrastrukturun qurulması Azərbaycanın iqtisadiyyatına birbaşa olaraq ÜDM-in 1-1,5 faizi həcmində müsbət təsir edir. Bununla yanaşı, peyk təsvirləri sənaye, logistika, kənd təsərrüfatı və digər sahələrin inkişafına da dolayısı ilə mühüm töhfə verir. Peyk təsvirlərinin əsas istehsalçıları olan agentliklər bu görüntüləri müxtəlif məqsədlərlə əldə edirlər – məsələn, istehsal proseslərinin təhlili və resursların idarə olunması üçün”.

Anar Nərimanov əlavə edib ki, Milli Məkan Məlumatları İnfrastrukturu çoxsaylı komponentləri – normativ-hüquqi bazanı, texnoloji və intellektual alətləri, standartları, bilik transferini və ölkənin rəqəmsal ekosistemini əhatə edən kompleks layihədir:

“Bir çox ölkələrin təcrübəsini araşdırarkən məkan məlumatları ilə bağlı 1500-dən çox məlumat layına rast gəlirik və onların ilkin mənbəsini məhz peyk təsvirləri təşkil edir”.