Erkən ölümün gözlənilməz amili açıqlandı

Çinin Siçuan Universitetinin alimləri belə nəticəyə gəliblər ki, yaşlı insanlarda dişlərin tökülmə sürəti erkən ölüm riskini göstərə bilər.

presstvaz xəbər verir ki, tədqiqatın nəticələri “BMC Geriatrics” jurnalında dərc olunub.

Tədqiqatda 8 073 yaşlı insan iştirak edib. Nəzarət altında olan şəxslərin sağlamlıq vəziyyəti orta hesabla 3.5 il müddətində müşahidə olunub. Təhlil göstərib ki, insanın dişləri nə qədər tez tökülürsə, ölüm ehtimalı bir o qədər yüksəkdir. Bu əlaqə yaş, cins, təhsil, fiziki aktivlik, siqaret və alkoqol istifadəsi kimi müxtəlif amillər nəzərə alınandan sonra da qorunub saxlanılıb.

Müəlliflər vurğulayırlar ki, dişlərin düşməsinin özü ölümün səbəbi deyil. Lakin o, orqanizmdə xroniki iltihab, ürək-damar xəstəlikləri və ya metabolik pozğunluqlar kimi gizli problemlərin əlaməti ola bilər. Bundan əlavə, dişlərin olmaması qidalanmanı çətinləşdirir, vacib maddələrin orqanizmə sovrulmasına mane olur və orqanizmin ümumi zəifləməsinə səbəb ola bilər.

Tədqiqatçılar ağız boşluğunun sağlamlığını nəzərdən qaçırmamağı tövsiyə edirlər. Onların fikrincə, müntəzəm olaraq stomatoloqa müraciət etmək, ağız gigiyenasına riayət etmək və siqaret çəkməkdən imtina etmək təkcə dişləri qorumağa deyil, həm də ömrü uzatmağa kömək edir. Dişlərin tökülməsi tempinin monitorinqi yaşlı insanın ümumi sağlamlıq vəziyyətini qiymətləndirməyin və risklərin erkən aşkarlanmasının sadə yolu ola bilər.