Cavid Abdullayev: “İşğaldan azad edilmiş ərazilərdə elektrik stansiyalarının istismara veriləcəyinin şahidi olacağıq”

“İşğaldan azad edilmiş ərazilərdə sənayemiqyaslı günəş və külək elektrik enerjisi stansiyalarının potensialının çox olduğu yerlər var”.

presstvaz xəbər verir ki, bunu Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev 30-cu Yubiley Xəzər İnşaat Həftəsində bildirib.

Onun sözlərinə görə, günəş enerjisi ilə bağlı Cəbrayıl və Zəngilan, külək enerjisi üzrə isə Laçın və Kəlbəcərdə ciddi potensial mövcuddur:

“Bu istiqamətdə müvafiq işlər gedir. Ümumilikdə, sözügedən zonalarda elektrik enerjisi stansiyalarının yaxın zamanlarda istismara veriləcəyinin şahidi olacağıq. Artıq stansiyaların bir qisminin təməli qoyulub, bir qismində ölçmələr gedir, bir hissəsində isə bütün müqavilə bazası hazırdır. Bütün bu proseslər müvafiq infrastruktur olmadan mümkün deyil”.

O əlavə edib ki, Cəbrayılda “Xudafərin” və “Qız Qalası” su elektrik stansiyaları (SES), eyni zamanda digər kiçik su elektrik stansiyalarının (KSES) qoyuluş gücünün təxminən 500 meqavatın üzərində olması gözlənilir.