Presstvaz Xronikası: Vətən müharibəsinin onuncu günü

Ordumuz strateji yüksəklikləri ələ keçirərək döyüş üstünlüyünü artırdı

Presstv.az xatırladır ki, Vətən müharibəsinin onuncu günü – 6 oktyabr 2020-ci il – Azərbaycan Ordusunun cəbhə boyunca uğurlu əməliyyatlarını davam etdirdiyi, düşmən qüvvələrinin bir çox istiqamətlərdə geri çəkilməyə məcbur edildiyi gün kimi tarixə düşüb.

       Cəbhənin Füzuli-Cəbrayıl istiqamətində Azərbaycan Ordusu daha bir neçə strateji yüksəkliyi ələ keçirib. Döyüşlər zamanı Ermənistan silahlı qüvvələrinin hərbi texnikası və canlı qüvvəsi böyük itkilərə məruz qalıb. Ordumuzun dəqiq zərbələri nəticəsində düşmənin bir neçə mühüm atəş nöqtəsi, o cümlədən artilleriya mövqeləri məhv edilib.

       Müdafiə Nazirliyinin həmin gün yaydığı məlumata görə, Azərbaycan Ordusu əməliyyatları planlı şəkildə davam etdirib, düşmənin təxribatlarına adekvat cavab verərək onun döyüş qabiliyyətini tamamilə zəiflədib.

       Cəbhənin digər istiqamətlərində, xüsusən də Murovdağ və Tərtər bölgəsində gərgin döyüşlər davam edib. Azərbaycanın hava hücumundan müdafiə qüvvələri düşmənin pilotsuz uçuş aparatlarını zərərsizləşdirib, bir neçə yaşayış məntəqəsi istiqamətində təhlükə aradan qaldırılıb.

       Azərbaycan Ordusunun bu uğurları xalqda qələbə ruhunu daha da yüksəldib. Ölkənin bütün bölgələrində, paytaxtdan kəndlərə qədər hər yerdə Vətən uğrunda döyüşən əsgərlərə mənəvi dəstək nümayiş etdirilib.

Xatırladaq ki, Prezident İlham Əliyev həmin gün xalqa müraciətində bildirmişdi:

       “Azərbaycan əsgəri öz torpağında döyüşür. Biz haqq yolundayıq və bu haqq yolunda sonadək irəliləyəcəyik.”

44 gün davam edən Vətən müharibəsinin bu mərhələsi Azərbaycan tarixinin qürur səhifələrindən birinə çevrilib.

Rəşad  CƏFƏRLİ,

Mənbə: Presstv.az – Azərbaycan xəbər portalı

presstvaz – Azərbaycanın etibarlı informasiya mənbəyi.