Hökmdən yeni ittihama – Diddi yenə cinsi təcavüzdə günahlandırıldı

ABŞ-də insan alveri ittihamında təqsirli bilinən məşhur reper Diddi (əsl adı – Şon Kombs) barəsində daha bir ittiham irəli sürülüb.

presstvaz bu barədə TMZ portalına istinadla xəbər verir.

Məlumata görə, Leyana Ripli Diddini cinsi təcavüzdə ittiham edib və ona qarşı iddia qaldırıb.

Məhkəmə sənədlərinə əsasən, hadisə 1 noyabr 2016-cı ildə Los-Ancelesdəki “Playhouse” gecə klubunda baş verib. Həmin vaxt Ripli özünün 20 yaşını qeyd edirmiş. Onun sözlərinə görə, Diddi imtinalarına baxmayaraq, onu təklif etdiyi içkini içməyə məcbur edib. Daha sonra isə reper ona qarşı cinsi zorakılıq hərəkətləri törədib. Ripli müqavimət göstərməyə çalışanda isə Kombs “Mən istədiyimi edirəm, ona görə də təslim ol”, – deyə cavab verib.

Hadisədən sonra qadında başgicəllənmə və dezoriyentasiya yaranıb, bədənində qançırlar, həmçinin cinsiyyət orqanlarında zədələr aşkarlanıb. O, yaşadığı psixoloji travmanı da vurğulayıb.

Zərərçəkmiş məhkəmə vasitəsilə maddi kompensasiya tələb edir. Onun işini reperə qarşı oxşar iddialar qaldırmış yüzdən çox müştərini təmsil edən vəkil Toni Buzbi aparır.

Xatırladaq ki, Nyu-York reperi insan alveri ittihamı üzrə iki epizodda təqsirli bilib və onu dörd il iki ay müddətinə azadlıqdan məhrum edib.