Filippində güclü zəlzələ nəticəsində ÖLƏNLƏRİN SAYI ARTDI

Filippində baş vermiş 6.9 ballıq güclü zəlzələ nəticəsində azı 69 nəfər həyatını itirib.

presstvaz bu barədə “Reuters”ə istinadla xəbər verir.

Bildirilir ki, episentrin yaxınlığında yerləşən Boqo şəhərinin xəstəxanaları artıq yaralılarla dolub-daşır.

Hökumət sağ qalanların axtarışı və elektrik təchizatının, su təchizatının bərpası üçün xidmətləri səfərbər edib.

06:55

Filippinin Sebu əyalətinin sahilində baş verən 6.9 maqnitudalı zəlzələdə ən azı 26 nəfər həlak olub və təxminən 150 nəfər yaralanıb. Zəlzələ binaların uçmasına səbəb olub, insanlar küçələrə qaçıblar, bəzi ərazilərdə elektrik enerjisi kəsilib.

presstvaz bu barədə “Al Jazeera”ya istinadən xəbər verir.

ABŞ Geoloji Tədqiqatlar İdarəsindən bildirilib ki, zəlzələ çərşənbə axşamı yerli vaxtla saat 21:59-da Sebu adasının şimalında, təxminən 90 000 sakini olan Boqo şəhəri yaxınlığında baş verib və ilk təkandan sonra bölgədə 5 və ya daha yüksək maqnitudalı dörd zəlzələ olub.

Filippin Milli Fəlakət Risklərinin Azaldılması və İdarəetmə Şurası çərşənbə günü erkən saatlarda 26 ölüm və 147 yaralanma hadisəsini qeydə alıb, 22 bina zədələnib.

Yerli xəbər mənbələrinə görə, yerli hakimiyyət orqanları Sebunun bəzi hissələrində “fəlakət vəziyyəti” elan edib.

Zəlzələ elektrik enerjisi kəsintilərinə səbəb olub və binaları, o cümlədən 100 ildən çox yaşı olan bir kilsəni dağıdıb.

Sebu əyalət hökuməti rəsmi “Facebook” səhifəsində zəlzələnin nəticələrinin aradan qaldırılmasında köməklik göstərmək üçün tibb könüllülərinə çağırış edib.

30 sentyabr, 19:40

Filippin sahillərində 6.9 maqnitudalı zəlzələ qeydə alınıb.

presstvaz bildirir ki, bu barədə Avropa-Aralıq dənizi Seysmoloji Mərkəzi məlumat yayıb.

Mərkəzin məlumatına görə, yeraltı təkanların episentri Boqo yaşayış məntəqəsindən 18 km şimal-şərqdə yerləşib. Zəlzələnin ocağı 10 km dərinlikdə olub.

Xəsarət alanlar və dağıntılar barədə məlumat verilmir.