“Kanada kraliçası” saxlanıldı

Kanada Milli Polisi özünü “Kanada kraliçası” elan edən Romana Didulonu saxlayıb.

presstvaz-ın xəbərinə görə, bu barədə “The Globe and Mail” nəşri məlumat verib.

Məlumata görə, onunla birlikdə 15 tərəfdarı da saxlanılıb. Polis xüsusi təyinatlılarının cəlb olunduğu əməliyyat Saskaçevanın ucqar əyalətlərindən birində həyata keçirilib ki, burada tərk edilmiş məktəbin binasında və onun ətrafında dayanan treylerlərdə “kral sarayı” yerləşir.

Bildirilib ki, həmin şəxslərin saxlanılması əməliyyatı onlarda odlu silahın ola biləcəyinə dair operativ məlumat daxil olduqdan sonra həyata keçirilib. Nəticədə polislər yalnız dörd nüsxə tapança tapıblar. Hazırda “kraliça” və tərəfdarları 24 saatlıq həbs ediliblər, onlara qarşı hələ ittiham irəli sürülməyib.

Qəzetin qeyd etdiyi kimi, Romana Didulo sosial şəbəkələrdə müxtəlif sui-qəsd nəzəriyyələrini təbliğ edir. Öz tərəfdarları ilə birlikdə o, “Kanada krallığını” təşkil edərək onun “kraliçasına” çevrilib. 2022-ci ildə Kanadanı bürüyən koronavirus məhdudiyyətlərinə qarşı etirazlar zamanı fəal Ottavaya gəlib və burada özünü ölkənin mütləq monarxı elan edib. Məlumdur ki, Didulo Filippində anadan olub, lakin 1990-cı ildə Kanadaya mühacirət edib.

Kanada rəsmi olaraq Britaniya monarxı III Çarlz tərəfindən idarə olunur.