Kamçatkada güclü zəlzələnin fəsadları: Daha bir şəhər yerini dəyişib

İyulun 30-da Kamçatka sahilləri yaxınlığında son 73 ildə baş verən 8.7 bal gücündəki ən güclü zəlzələ Vladivostokda da hiss olunub. Şəhər cənuba doğru demək olar ki, 5 sm, daha sonra isə eyni məsafədə şimala doğru yerini dəyişib.

presstvaz-ın RTVI.com-a istinadən xəbərinə görə, bu barədə Uzaq Şərq Federal Universitetinin Politexnik İnstitutunun professoru Nikolay Şestakov danışıb.

“Hətta episentrdən 2 350 km aralıda yerləşən Vladivostokdakı stansiyalar belə Kamçatka zəlzələsi nəticəsində yaranan yer səthinin hərəkətlərini hiss edib. Əsas təkandan 10 dəqiqə sonra şəhərimiz cənuba təxminən 5 sm, daha sonra isə eyni ölçüdə şimala doğru “sürüşüb”, – deyə alim bildirib.

Universitetdən qeyd ediblər ki, Kamçatkanın müxtəlif nöqtələrində əldə edilən yerdəyişmələrdəki fərqlər xüsusi maraq doğurur. Yarımadanın cənubunda maksimal yerdəyişmə qeydə alındığı halda, episentrə daha yaxın olan Petropavlovsk-Kamçatskda yer qabığı yarım metr yer dəyişib və 10 sm-dən az çöküb.

Alimlər bu yerdəyişməni zəlzələ mənbəyinin yerinin və strukturunun xüsusiyyətləri ilə izah edirlər.

“Ən maraqlı sual budur ki, niyə Kamçatkada insanlar yer qabığının belə böyük yerdəyişmələrini görmədilər? İzahı olduqca sadədir. Birincisi, nəhəng ərazi eyni anda yerini dəyişir. Buna görə də yaxınlıqdakı evlər və ya dağlar yeraltı təkanlardan dağılmır, onların bir-birinə nisbətən mövqeyi dəyişmir – onlar birlikdə yerdəyişmə edirlər. İkincisi, belə hərəkətlərin sürəti azdır (saniyədə 10 millimetr)”, – deyə Nikolay Şestakov qeyd edib.

Professorun sözlərinə görə, sürətlər o qədər aşağıdır ki, güclü seysmik dalğalanmalar fonunda insan bunu hiss edə bilmir.

“Lakin dənizin kənarında dayansaq, sahilin necə çökdüyünü görmək olar – su torpağın bir hissəsini basacaq. Düzdür, əvvəlcə sunami hücumlarının bitməsini gözləmək və yalnız bundan sonra sahilə çıxmaq lazımdır”, – deyə alim əlavə edib.

Xatırladaq ki, iyulun 30-da yerli vaxtla saat 11:24-də (Bakı vaxtı ilə 3:24) Sakit okeanda Kamçatka yaxınlığında 8.7 bal gücündə zəlzələ baş verib. Təkanların episentri Petropavlovsk-Kamçatskdan 161 km şərqdə, 32 km dərinlikdə yerləşib. Zəlzələdən sonra çox sayda afterşok qeydə alınıb.

Kamçatkada baş verən güclü zəlzələdən sonra bölgədə ciddi geodinamik dəyişikliklər qeydə alınıb. İlkin məlumatlara görə, yarımadanın cənub hissəsi təxminən iki metr cənub-şərq istiqamətinə sürüşüb.