Marko Rubio: “Azərbaycan və Ermənistan arasında sülh müqaviləsinin əsası qoyulur”

Avqustun 8-də Vaşinqtonda Azərbaycan və Ermənistan arasında sülh müqaviləsinin əsasını təşkil edəcək razılaşmanın imzalanması gözlənilir.

presstvaz-ın verdiyi məlumata görə, bu barədə ABŞ-nin dövlət katibi Marko Rubio jurnalistlərin suallarını cavablandırarkən bildirib.

O bəyan edib ki, ABŞ prezidenti sülhə sadiqdir.

“Biz Hindistan və Pakistan arasında müharibə baş verdikdə birbaşa müdaxilə etdik və prezident (Donald Tramp) bu istiqamətdə sülhün əldə olunmasına nail oldu. Daha yaxın zamanlarda Kamboca və Tailand, eləcə də Azərbaycan və Ermənistan arasında proseslərdə irəliləyiş var”, – deyə dövlət katibi bildirib.

“Azərbaycan və Ermənistan məsələsinə gəldikdə, (bu gün) sülh müqaviləsinin başlanğıcını qoyacaq razılaşmanı imzalamaq üçün burada olacağıq”, – deyə o əlavə edib.

Marko Rubio, həmçinin Afrika qitəsində uzunmüddətli münaqişələrin həlli istiqamətində də irəliləyişlər əldə olunduğunu qeyd edib:

“Konqo Demokratik Respublikası və Ruanda arasında 30 ildir davam edən, yeddi milyon insanın həyatına son qoyan müharibəyə də müdaxilə etdik. Tərəfləri buraya gətirdik və sülh sazişi imzalandı”.

Rubio vurğulayıb ki, əldə olunan sülh sazişlərinin qorunması və davamlılığı üçün mütəmadi iş aparılmalıdır:

“Sülh daimi olmur, onu qorumaq və möhkəmləndirmək üçün daim çalışmaq lazımdır”.