Pandemiya hər kəsin beynini qocaldıbmış – Araşdırma

İngiltərədə aparılan son araşdırma pandemiyanın təkcə bədən sağlamlığına deyil, beyin fəaliyyətinə də mənfi təsir etdiyini üzə çıxarıb. Nottingham Universitetinin alimləri tərəfindən aparılan genişmiqyaslı tədqiqatda məlum olub ki, COVID-19 pandemiyası zamanı insanların beyinləri 2020-ci ildən əvvəlki dövrlə müqayisədə orta hesabla 5,5 ay daha tez yaşlanıb.

presstvaz xəbər verir ki, UK Biobank layihəsində yer alan 15 min nəfərdən çox yetkin şəxsin beyin görüntüləri üzərində aparılan analizlər nəticəsində bu qənaətə gəlinib. Alimlər pandemiyadan əvvəl və pandemiya dövründə taranan insanların beyin yaşlarını xüsusi süni intellekt modeli ilə müqayisə ediblər.

Tədqiqatı aparan nevroloq Ali-Reza Mohammadi-Nejad bildirib ki, virusu keçirməyən şəxslərdə belə beyin yaşlanmasında artım qeydə alınıb:

"İzolyasiya, qeyri-müəyyənlik və sosial təcrid kimi faktorlar belə mənfi nəticələrə səbəb olub."

Nevroloq Dorothee Auer isə bildirib ki, əldə olunan nəticələr iki ayrı zaman nöqtəsinə əsaslandığı üçün, bu dəyişikliklərin geri dönməsi mümkündür.

"Bu, beyin sağlamlığı üçün ümidverici perspektivlər yaradır," – deyə o qeyd edib.

Araşdırmada vurğulanır ki, beyin yaşındakı bu artım hər zaman zehni performansın zəifləməsi demək deyil. Əsl bilişsel geriləmə halları yalnız COVID-19 virusu ilə yoluxmuş şəxslərdə müşahidə olunub.

Tədqiqatın nəticələrinə görə, kişilərdə və yaşlı, sosial və iqtisadi cəhətdən zəif təbəqələrə mənsub şəxslərdə daha çox beyin dəyişiklikləri qeydə alınıb.

Alimlər bildirirlər ki, bu tədqiqat hələ ilkin nəticələr təqdim etsə də, gələcəkdə daha geniş və uzunmüddətli görüntüləmə tədqiqatları beyin strukturundakı dəyişikliklərin səbəblərini və nəticələrini daha dəqiq ortaya qoya bilər.