Suriya Əs-Süveydaya daxili təhlükəsizlik qüvvələrini yerləşdirməyə başladı

Suriyanın keçid dövrü hökuməti druz icması ilə bədəvi qəbilələri arasında şiddətli döyüşlərin getdiyi cənubdakı Əs-Süveyda əyalətində daxili təhlükəsizlik qüvvələrini yerləşdirməyə başlayıb.

presstvaz-ın Oreanda-news.com nəşrinə istinadən xəbərinə görə, bu barədə Suriya Daxili İşlər Nazirliyinin rəsmi nümayəndəsi Nurəddin əl-Bab məlumat verib.

DİN rəsmisi buna səbəb kimi cinayətkar qruplaşmalar tərəfindən törədilən qanlı hadisələri göstərib.

Daxili İşlər Nazirliyinin “Syria TV” tərəfindən yayımlanan açıqlamasına görə, əməliyyat prezidentin göstərişi ilə həyata keçirilib və dinc əhalinin qorunması, xaosun qarşısının alınması üçün ümummilli vəzifənin bir hissəsidir.

Əl-Bab əmin edib ki, bütün hökumət strukturları Əs-Süveydada sabitliyin bərpası üçün çalışır.

Xatırladaq ki, iyulun 13-də silahlı qruplaşmaların druz kəndlərinə hücumundan sonra münaqişə kəskinləşib. Eyni zamanda, İsrail druzların qorunmasının zəruriliyini əsas gətirərək, Dəməşqin əsas hədəflərinə hava zərbələri endirib.

Suriya rəsmiləri vəziyyətin nizama salınması üçün Əs-Süveydada hazırladıqları hərbi əməliyyatla bağlı İsrailə xəbərdarlıq etdiklərini deyiblər.