Paşinyan Qarabağın Azərbaycanın bir hissəsi kimi tanınması barədə: “Bu, daha əvvəl edilməli idi”

Qarabağın Azərbaycanın bir hissəsi kimi tanınması barədə qərar hələ 2022-ci ildə verilib və bu, regionda sərhədlərin hüquqi müəyyənləşdirilməsi zərurəti ilə bağlıdır.

presstvaz erməni KİV-ə istinadən xəbər verir ki, bu barədə Ermənistanın baş naziri Nikol Paşinyan bildirib.

Mətbuat konfransında çıxış edən Paşinyan xatırladıb ki, 2022-ci ilin sentyabrında Ermənistan Azərbaycandan gələn təhlükə ilə əlaqədar Kollektiv Təhlükəsizlik Müqaviləsi Təşkilatına (KTMT) yardım üçün müraciət edib. Lakin onun sözlərinə görə, cavab “sərhəd aydın deyil” olub ki, bu da müttəfiqlərin Ermənistanın ərazi bütövlüyü anlayışını şübhə altına alır.

“Bizdə bir sual yarandı: “qırmızı xətt” haradan keçir? İndiyədək heç kim onu göstərməyib. Biz də özümüzə sual verməyə başladıq: KTMT üzrə tərəfdaşlarımız bizim ərazi bütövlüyümüzü tanıyırmı? Biz özümüz onu tanıyırıqmı?”, – deyə baş nazir qeyd edib.

Paşinyanın sözlərinə görə, nəticədə Ermənistanın qonşularının ərazi bütövlüyünü rəsmən tanıması barədə qərar qəbul edilib ki, bunun müqabilində eyni şeyi tələb etmək üçün mənəvi-siyasi əsas olsun.

“Ona görə də 2022-ci il oktyabrın 6-da mən Azərbaycanın ərazi bütövlüyünü tanıdım. Bu, daha əvvəl edilməli idi”, – deyə o vurğulayıb.