Ərdoğan: “Zəngəzur dəhlizi geoiqtisadi inqilabın tərkib hissəsidir”

“Zəngəzur dəhlizi təkcə Azərbaycan üçün deyil, bütün region üçün faydalı olacaq”.

presstvaz “Haber Global”a istinadən xəbər verir ki, bu sözləri Türkiyə Prezidenti Rəcəb Tayyib Ərdoğan Azərbaycana səfərindən sonra jurnalistlərə müsahibəsində deyib.

O qeyd edib ki, Türkiyə bu dəhlizi təkcə geosiyasi deyil, həm də geoiqtisadi inqilabın tərkib hissəsi kimi görür.

“Zəngəzur dəhlizinin açılışı Orta Dəhliz üçün strateji addım olacaq. Dəhliz açıldığı zaman Türkiyə malları Xəzərdən keçərək Orta Asiyaya və Çinə daha sürətlə çatacaq, Avropadan Çinə gedən mallar da Türkiyədən keçməyə başlayacaq. Orta Dəhlizin açılması cənubdan bizə və Azərbaycana qədər bir çox ölkələri əhatə edir. Bu prosesdə bütün addımlarımızı ən yaxşı şəkildə atırıq. Burada ən önəmlisi Zəngəzur xəttidir. Bu xəttə dəmir yolu sistemi də daxildir. Bu səbəbdən yükdaşımalarda Zəngəzur xəttinin əhəmiyyəti artır və artacaq”, – deyə o vurğulayıb.

R.T.Ərdoğan onu da qeyd edib ki, Azərbaycan Prezidenti İlham Əliyev bu məsələyə böyük önəm verir.

“Bundan əlavə, Zəngəzur dəhlizi açıldığı zaman Türkiyənin Qars-Iğdır-Naxçıvan dəmir yolu xətti və Qarabağda tikinti yatırımları daha səmərəli fəaliyyət halına gələcək”, – Türkiyə prezidenti bildirib.