“Ən-Nəsr” Stefano Piolinin istefaya göndərildiyini açıqladı

Səudiyyə Ərəbistanının “Ən-Nəsr” klubu baş məşqçi Stefano Piolinin istefaya göndərildiyini açıqlayıb.

presstvaz-ın xəbərinə görə, bu barədə klub “X” hesabında paylaşım edib.

Komandanın mətbuat xidməti italiyalı mütəxəssisə əməkdaşlığa görə təşəkkür edib.

“Ən-Nəsr” klubu elan edir ki, cənab Pioli və onun əməkdaşları artıq birinci komandanın mövcud məşqçi heyətinin tərkib hissəsi deyillər.

Biz cənab Pioli və onun əməkdaşlarına ötən mövsüm ərzində göstərdikləri fədakar iş üçün təşəkkür etmək istərdik”, – deyə paylaşımda bildirilib.

Qeyd edək ki, daha əvvəl Stefano Piolinin “Ən-Nəsr”dən ayrıldıqdan sonra “Fiorentina”ya rəhbərlik edəcəyi bildirilirdi. Mütəxəssis, hətta İtaliya klubu üçün ilk transfer hədəfinə – bosniyalı hücumçu Edin Cekoya da qərar verib.

Xatırladaq ki, “Ən-Nasr” Piolinin rəhbərliyi altında Səudiyyə Ərəbistanı çempionatının son mövsümündə üçüncü yeri tutub. İtalyan mütəxəssis komandaya 2024-cü ilin sentyabrında başçılıq edib. Əvvəllər Stefano Pioli “Bolonya”, “Latsio”, “İnter”, “Fiorentina” və “Milan”da çalışıb.