Demokratlar Trampa qarşı istintaqa başlamaq istəyirlər

Demokratlar Partiyası 2026-cı ildə keçiriləcək aralıq seçkidən sonra ABŞ Konqresinin palatalarından birində səs çoxluğu əldə edə bilsə, demokratlar prezident Donald Tramp və ailəsi ilə bağlı araşdırma aparacaqlar.

presstvaz “Breitbart” portalına istinadən xəbər verir ki, bunu Konqresin üzvü Jasmin Krokett deyib.

Krokett bildirib ki, demokratlar Trampın Qətərin kral ailəsindən “Boeing 747” təyyarəsi kimi bahalı hədiyyəni qəbul edərək, qanunu pozub-pozmadığını araşdırırlar. O əlavə edib ki, hazırda ABŞ administrasiyası tərəfindən bağlanan bütün iş sövdələşmələri ilə bağlı araşdırma aparılacaq.

Xatırladaq ki, mayın 14-də Tramp “Boeing 747″nin ABŞ Hərbi Hava Qüvvələrinə veriləcəyini açıqlamışdı. O vurğulayıb ki, təyyarə şəxsən ona hədiyyə verilməyib və hökumət tərəfindən müvəqqəti “Air Force One” – ABŞ Hərbi Hava Qüvvələrinə məxsus prezidenti daşıyan təyyarə kimi istifadə olunacaq. Ağ Evin rəhbərinin sözlərinə görə, yalnız axmaq belə hədiyyəni qəbul etməz.