ABŞ-də senator Co Baydenin sağlamlıq vəziyyəti ilə bağlı istintaqa başlayacaq

ABŞ-də senator sabiq prezident Co Baydenin sağlamlıq durumu ilə bağlı istintaqa başlayacaq.

presstvaz xəbər verir ki, bu barədə “Axios” portalı məlumat yayıb.

Viskonsin ştatından olan respublikaçı senator Ron Conson bildirib ki, Co Baydenin prezident olduğu dövrdə onun sağlamlıq vəziyyətinin araşdırılması üçün istintaqa başlamağı planlaşdırır.

Senatın Milli Təhlükəsizlik və Hökumət İşləri Komitəsinin, eləcə də onun istintaq üzrə altkomitəsinin üzvü olan Conson qeyd edib ki, bu məsələ ilə bağlı “onlarla şəxsə” müraciət edərək müvafiq sorğular göndərəcək.

“Biz bunu etməliyik. Yəni, müəyyən etməliyik ki, hökuməti əslində kim idarə edib”, – deyə nəşr onun sözlərini sitat gətirib.

Qeyd edək ki, mayın 18-də Baydenin ofisi 82 yaşlı keçmiş prezidentə aqressiv prostat xərçəngi diaqnozu qoyulduğunu açıqlayıb. ABŞ Prezidenti Donald Tramp isə bu diaqnozun yalnız indi məlum olmasına şübhə ilə yanaşaraq, məlumatın gizlədilə biləcəyinə eyham vurub.