Avropa İttifaqı Türkiyə ilə daha sıx əməkdaşlıq etmək məcburiyyətindədir

Avropa İttifaqı (Aİ) ABŞ Prezidenti Donald Trampın ona etinasız münasibəti fonunda qitənin təhlükəsizliyini gücləndirmək zərurətinə görə Türkiyə ilə münasibətləri inkişaf etdirməkdə maraqlıdır.

presstvaz xəbər verir ki, bu barədə “Financial Times” (FT) qəzeti mənbələrə istinadən məlumat verib.

Məlumata görə, ABŞ-nin hazırkı administrasiyasının Avropa təhlükəsizliyinə açıq şəkildə diqqət yetirməməsi nəzərə alınmaqla, strateji əhəmiyyətə malik olan Türkiyə ilə Aİ-nin daha sıx tərəfdaşlığı qaçılmazdır. Qeyd olunur ki, Türkiyənin xarici işlər naziri, Milli Kəşfiyyat Təşkilatının keçmiş rəhbəri Hakan Fidan mütəmadi olaraq Aİ-nin müdafiə tədbirlərinə dəvət olunur.

Qəzetə danışan Qərb diplomatının sözlərinə görə, Aİ-yə üzv olan ölkələr Ankara ilə daha sıx əməkdaşlıq etmək və bir neçə yeni fəaliyyət sahəsi üçün əlavə kanal açmaqda maraqlıdırlar. Bildirilir ki, bu yanaşma, ikitərəfli münasibətlərdə mövcud dəyişiklikləri əks etdirir.

“Aydın oldu ki, Avropanın təhlükəsizliyini Türkiyəsiz, xüsusən də onun müdafiə sənayesi olmadan təsəvvür etmək mümkün deyil”, – deyə qəzet Prezident Rəcəb Tayyib Ərdoğandan sitat gətirib.

Dövlət başçısı ötən ay Antalya Diplomatik Forumunun açılış mərasimində bildirib ki, Aİ mövcud çətinliklərin öhdəsindən gəlmək istəyirsə, Türkiyəni tamhüquqlu üzv kimi öz sıralarına qəbul etməlidir.

Ərdoğan vurğulayıb ki, Türkiyənin Aİ-yə üzv olmaq məqsədindən uzaqlaşdığına dair iddia və tənqidlər tamamilə əsassızdır, çünki bu, ölkənin strateji hədəfi olaraq qalır.