“Telegram”ın böyük yenilənməsi: 200 iştirakçı ilə şifrələnmiş zənglər, ekran yayımı, ağıllı botlar

Populyar mesajlaşma platforması “Telegram” 11.1 versiyası üçün irimiqyaslı yeniləmə təqdim edib.

presstvaz-ın iphones.ru-ya istinadla verdiyi məlumata görə, yeni imkanlar həm adi istifadəçilərə, həm də biznes hesabı sahiblərinə aiddir.

Bildirilir ki, bu yeniləmə onlayn ünsiyyət və biznesin idarə olunması prinsiplərini əsaslı şəkildə dəyişə biləcək bir sıra innovativ funksiyalarla müşayiət olunur.

 

 

200 nəfərlik şifrələnmiş qrup zəngləri

“Telegram 11.1″in əsas yeniliklərindən biri eyni vaxtda 200-ə qədər iştirakçını dəstəkləyən şifrələnmiş qrup zəngləridir. İndi istifadəçilər link və ya QR-kod vasitəsilə iştirakçıları dəvət edərək genişmiqyaslı audio və videokonfranslar təşkil edə bilərlər. Zəng zamanı cihazın ekranını yayımlamaq funksiyası mövcuddur ki, bu da təqdimatlar, təlim və birgə iş üçün yeni imkanlar açır.

Qrup video zəngi başlatmaq üçün “Telegram”da istənilən kontakta zəng etmək, sağ yuxarı küncdəki “İştirakçı əlavə et” düyməsini basmaq və yaradılmış linki dəvət etmək istədiyiniz şəxslərlə paylaşmaq kifayətdir. Bir link 200 nəfərə qədər qoşulmağa imkan verir, hər iştirakçı üçün yeni dəvətnamələr yaratmaq ehtiyacını aradan qaldırır.

Biznesin avtomatlaşdırılması üçün süni intellekt (Sİ) botların inteqrasiyası

“Telegram”dakı biznes hesabı sahibləri indi hesabın idarəsini öz üzərinə götürəcək Sİ əsaslı üçüncü tərəf çat-botlarını qoşa bilərlər. Bunun sayəsində yazışmaları, profil dəyişikliklərini, əməliyyatları və qarşılıqlı əlaqə tarixçəsini tam avtomatlaşdırmaq mümkündür.

Hədiyyələrin fərdiləşdirilməsi

Parametrlərdə indi profildə hansı hədiyyələrin göstəriləcəyini seçmək mümkündür. “Premium” istifadəçilər, həmçinin onlara hədiyyə edilə biləcək hədiyyə kateqoriyalarını göstərə bilərlər.

Mobil tətbiqlərdə təkmilləşdirmələr

“Telegram” indi dələduzluq və ya spam şübhəsi olduqda hesabları müvəqqəti olaraq dondura bilər. Dondurulma halında istifadəçi birbaşa tətbiqdən şikayət edə bilər. Əgər pozuntu təsdiqlənməzsə, hesab dondan çıxarılacaq və bütün məhdudiyyətlər götürüləcək.

“iOS” və “Android” tətbiqlərində mesajları “Seçilmişlər”ə və ya son söhbətlərə tez yönləndirmək üçün yeni jest əlavə edilib. Həmçinin “iOS” tətbiqində indi hekayələr zolağını sağa çəkməklə tez bir hekayə paylaşmaq mümkündür.