KİV: İran ABŞ-yə aralıq sazişi təklif edib

İranın xarici işlər naziri Abbas Əraqçi ABŞ prezidentinin xüsusi elçisi Stiven Uitkofa Tehranın nüvə proqramı ilə bağlı aralıq sazişi bağlamağı təklif edib.

presstvaz “Axios”a istinadən xəbər verir ki, Romada keçirilən məsləhətləşmələrdə Əraqçi qeyd edib ki, ABŞ Prezidenti Donald Trampın təklif etdiyi 60 günlük müddət ərzində nüvə proqramı ilə bağlı yekun sazişə nail olmaq çətin ola bilər. Nazir xüsusi elçiyə bildirib ki, mümkün sazişin texniki xüsusiyyətlərini nəzərə alaraq danışıqları iki ay ərzində başa çatdırmaq çox çətin olacaq.

Uitkoff isə cavab olaraq hazırda aralıq sazişi müzakirə etmək istəmədiyini, əvəzində 60 gün ərzində hərtərəfli sazişə nail olmağa üstünlük verdiyini bildirib.

Bununla belə, Uitkoff əlavə edib ki, əgər müddət yaxınlaşdıqca hər iki tərəf əlavə vaxta ehtiyac olduğunu düşünsə, aralıq sazişi ideyasına qayıda bilərlər.

İranın BMT-dəki nümayəndəliyi “Axios”un məlumatını təkzib edərək bunun yalan və həqiqətə uyğun olmadığını bildirib. ABŞ Dövlət Departamenti isə şərh verməkdən imtina edib.