Yəmənin Ras-İsa limanına ABŞ-nin hava zərbələri: 38 ölü, 102 yaralı

ABŞ Silahlı Qüvvələrinin Mərkəzi Komandanlığı (CENTCOM) Yəməndəki Ras-İsa neft limanına zərbələr endirildiyini və limanın məhv edildiyini açıqlayıb.

presstvaz xarici mediaya istinadən xəbər verir ki, bu addım İran tərəfindən dəstəklənən husi terrorçularının yanacaq mənbəyini aradan qaldırmaq məqsədi daşıyıb.

CENTCOM-un bəyanatında qeyd olunub ki, Ras-İsa limanı husilər tərəfindən hərbi əməliyyatlarını dəstəkləmək, nəzarət vasitəsi kimi istifadə etmək və idxaldan əldə edilən mənfəəti mənimsəmək üçün yanacaq əldə etmək məqsədilə istifadə olunub. Endiriən zərbələrin məqsədi husilərin iqtisadi potensialını zəiflətmək olub.

Husilərin rəsmi “Ənsar Allah” “Telegram” kanalında ABŞ-nin Ras-İsa limanına 14 hava zərbəsi endirdiyi bildirilib. Nəticədə 38 nəfər həlak olmuş, 102 nəfər isə ağır yaralanıb. Husilər iddia ediblər ki, liman tamamilə mülki infrastruktur olub.

Ras-İsa limanı Yəmənin Qırmızı dənizdəki əsas neft ixrac mərkəzlərindən biri olub. Limanın məhv edilməsi Yəməndəki vəziyyəti daha da gərginləşdirə və humanitar böhranı dərinləşdirə bilər.