Kobaxidze: “Gürcüstanı 2022-ci ildə Ukraynadakı münaqişəyə qoşulmağa çağırırdılar”

“Gürcüstan 2022-ci ilin fevralında Rusiya ilə Ukrayna arasındakı münaqişəyə qoşulmaq üçün xarici ölkələrdən iki müraciət alıb”.

presstvaz TASS-a istinadən xəbər verir ki, bu sözləri Gürcüstanın Baş naziri İrakli Kobaxidze Antalya Diplomatik Forumunda çıxışı zamanı deyib.

“2022-ci ilin fevralında biz Rusiya və Ukrayna arasında hərbi münaqişəyə qoşulmaq üçün müraciət aldıq. Daha bir oxşar müraciət 2022-ci ilin fevral ayının sonunda gəldi. Gürcüstana münasibətdə çox kobud siyasi maraq var idi. Belə bir vəziyyətdə diplomatiya fayda verməyəcəkdi. Biz Gürcüstanın və dünyanın milli maraqlarının qorunması üçün intensiv siyasi mübarizəyə başlamalı olduq. Bu, hər hansı diplomatiya olmadan sadəcə siyasi mübarizə idi”, – deyə Kobaxidze bildirib.

Onun sözlərinə görə, Gürcüstan və ölkə hakimiyyəti hələ də bu çağırışlarla üzləşirlər.

“Biz müxtəlif diplomatik üsullardan istifadə etməklə, bütün diqqətimizi sülh və xalqımızın rifahı üçün mübarizəyə yönəltmişik”, – deyə İrakli Kobaxidze əlavə edib.

Gürcüstan hökumətinin başçısı qeyd edib ki, sülhün bərqərar olmasını gözləmək lazımdır. Kobaxidze hesab edir ki, sülh bərqərar olan kimi diplomatiya yenidən kobud siyasi maraqlara qalib gəlməyə başlayacaq.