ABŞ-nin Qrenlandiyadakı hərbi bazasında qalmaqal: Etimadı itirən komandir işdən çıxarıldı

Pentaqon ABŞ-nin Qrenlandiyanın şimalındakı Pituffik hərbi kosmik bazasının komandiri polkovnik Suzanna Meyersi vəzifəsindən azad edib, onun yerinə Şon Li təyin edilib.

presstvaz-ın məlumatına görə, bu barədə ABŞ müdafiə nazirinin ictimaiyyətlə əlaqələr üzrə köməkçisi Şon Parnellin “X”də dərc etdiyi mətbuat açıqlamasında deyilir.

Bildirilir ki, onun yerinə polkovnik Şon Li komandanlığı qəbul edib.

Parnelin paylaşımına military.com portalının məqaləsi bərkidilib. Məqalədə iddia olunur ki, Meyers ABŞ vitse-prezidenti Cey Di Vensin səfərindən bir neçə gün sonra Pituffikdəki əməkdaşlarına elektron məktub göndərib. Məktubda o, Vensin Danimarkanı və onun Qrenlandiyanı idarə etmək qabiliyyətini tənqid etməsini pisləyib.

“Mən cari siyasəti anladığımı iddia etmirəm, lakin bilirəm ki, ABŞ administrasiyasının narahatlıqları Pituffik kosmik bazasındakı vəziyyəti əks etdirmir”, – deyə elektron məktubda bildirilib.

Xatırladaq ki, Vens martın 28-də Pituffik bazasında bəyan edib ki, Kopenhagen adanın təhlükəsizliyini təmin etmək üçün kifayət qədər tədbirlər görmür. Danimarka Baş naziri Mette Frederiksen krallığa qarşı tənqidi ədalətsiz adlandırıb.