BDU-da məzun kitabçası NARAZILIĞI: “Öz fotoqrafımıza şəkil çəkdirməyə icazə vermirlər”

Bakı Dövlət Universitetinin tələbələri məzun çəkilişi ilə bağlı narazılıq ediblər.

presstvaz Oxu.Az-a istinadən xəbər verir ki, tələbələrin narazılığına səbəb məzun şəkillərini məhz universitet fotoqrafına çəkdirmək tələbidir.

“Biz məzun kitabçası üçün fotoqrafla danışmışıq. Sonradan bizə deyilib ki, yalnız universitetin təyin etdiyi fotoqrafa şəkil çəkdirə bilərik. Dəfələrlə etiraz etsək də, müsbət cavab ala bilmədik. Belə olan halda isə danışdığımız fotoqrafa verdiyimiz behimiz batacaq. Əlavə ödəniş etməklə ürəyimiz istəməyən fotoqrafa şəkil çəkdirmək məcburiyyətindəyik”, – deyə şikayətdə bildirilir.

Məsələ ilə bağlı BDU-nun mətbuat xidmətindən Oxu.Az-ın sorğusuna cavab olaraq bildirildi ki, hələ məzun çəkilişləri başlamayıb.

“Məzunlar “Məzun günü” çəkilişlərini öz arzularına uyğun olaraq universitetlə yanaşı şəhərin müxtəlif yerlərində aparırlar. Universitet ərazisində məzun günü çəkilişlərinin aparılması üçün şərait yaradılır”,- deyə məlumatda bildirilir.