Rusiyada deputatı parçalayan pələng güllələndi

Rusiyanın Primorye bölgəsində insana hücum edən Amur pələngi “Udeqey əfsanəsi” milli parkının ərazisində güllələnib.

presstvaz-ın məlumatına görə, bu barədə qurumun “Telegram” kanalının məlumatından məlum olub.

Bildirilib ki, yırtıcının tutulması üzrə xüsusi əməliyyat zamanı heyvan parkın dövlət müfəttişinə hücum edib. Əməkdaş özünü müdafiə edərək silahdan istifadə edib ki, bu da heyvanın ölümünə səbəb olub. Eyni pələng daha əvvəl, martın 11-də Primorye meşə təsərrüfatının Roşinski filialının işçisinin ölümünə səbəb olub.

Ortayaşlı erkək kimi müəyyən edilən pələng uzun müddət parkda və qonşu ov sahələrində yaşayıb, insanlara qarşı aqressiya göstərməyib.

Lakin onun insana hücumundan sonra, tutulmasına icazə alındıqda, mütəxəssislər pələngin normal ov etməsinə mane olan ciddi zədələrin izlərini aşkar ediblər. Heyvanın ölümdən sonrakı müayinəsi həmcinsləri və ya şikarı ilə təbii münaqişələr üçün xarakterik olmayan köhnə yaraların mövcudluğunu təsdiqləyib.

Milli parkda ehtimal edirlər ki, məhz bu zədələr heyvanın faciəyə səbəb olan qeyri-adi davranışını təhrik edib.

Yırtıcının cəsədi baş verənlərin şəraitini dəqiqləşdirmək üçün ekspertizaya göndərilib.

Qeyd edilib ki, güllələnmə hadisəsi haqqında məlumat gecikmə ilə – yalnız bütün zəruri prosedurlar başa çatdıqdan sonra dərc olunub.

Xatırladaq ki, martın 11-də Rusiyanın Primorye vilayətinin şimalında pələng meşəbəyiyə hücum edib. Məlumata görə, 55 yaşlı Andrey adlı kişi qolu qopmuş vəziyyətdə, ölü olaraq tapılıb. Həmçinin onun kənd deputatı olduğu üzə çıxıb.