Amerikalı admiral: “Avropa NATO-nun dağılmasına hazırlaşır, öz ordularını yaratmaq istəyirlər”

“Hazırda Avropa NATO-nun tam şəkildə dağılmasına hazırlaşır. Alyansın ABŞ ilə əməkdaşlığı başa çatmaq üzrədir”.

presstvaz xəbər verir ki, bu sözləri “Bloomberg”ə açıqlamasında NATO-nun Avropadakı qüvvələrinin keçmiş komandanı, ABŞ Hərbi Dəniz Qüvvələrinin istefada olan admiralı Ceyms Stavridis deyib.

Admiral qeyd edib ki, son vaxtlar Donald Tramp Administrasiyası NATO-nu daha çox tənqid edir və bunu açıq şəkildə edir.

“Misal üçün, ABŞ-nin vitse-prezidenti Ceyms Devid Vens bildirib ki, Şimali Atlantika Alyansı Vaşinqtonun maraqlarına xidmət etmir. Bu isə ABŞ tərəfi ilə NATO arasında münasibətləri xeyli pisləşdirir” – deyə Ceyms Stavridis bildirib.

C.Stavridis vurğulayıb ki, vəziyyət ABŞ-nin beynəlxalq aləmdə atdığı addımlar nəticəsində gərginləşir.

“Vaşinqton Avropa İttifaqının (Aİ) Ukrayna ilə bağlı qətnaməsini dəstəkləməyib, həmçinin Avropanın təklif etdiyi münaqişənin həlli üsullarını rədd edib. Nəticədə Avropa Birliyində bir çoxları ABŞ ilə münasibətləri pozmağa başladılar. Məsələn, Fransa və Böyük Britaniya artıq Aİ-nin öz ordusunun yaradılmasının zəruriliyindən açıq şəkildə danışır. Bundan əlavə, Avropa İttifaqı xarici siyasətdə Vaşinqtondan ayrılmaq istəyir”, – deyə C.Stavridis qeyd edib.