Çindən ABŞ-yə cavab tədbirləri: Əlavə rüsumların tətbiqinə başlanıldı

Çin ABŞ Prezidenti Donald Trampın tarif siyasətinə cavab olaraq martın 10-dan etibarən ABŞ-nin kənd təsərrüfatı məhsullarına 10-15% əlavə rüsumlar tətbiq edəcək.

presstvaz-ın xəbərinə görə, bu barədə Çin Ticarət Nazirliyindən məlumat verilib.

Məlumata görə, 15% həcmində əlavə rüsumlar ABŞ-dən toyuq, buğda, qarğıdalı və pambığa aid ediləcək. Sorqo, soya paxlası, donuz əti, mal əti, su sənayesi məhsulları, meyvə, tərəvəz və süd məhsullarına 10% əlavə rüsumlar tətbiq ediləcək.

Çin həmçinin ölkənin təhlükəsizliyinin və maraqlarının qorunması üçün 15 ABŞ şirkətini ixrac nəzarəti siyahısına əlavə edib.

Nazirliyin bildirdiyinə görə, sanksiyalar siyahısına daxil edilən 15 subyekt Çinin milli təhlükəsizliyi və maraqlarına təhdid yaradır. Çin tədarükçülərinə qeyd olunan ABŞ şirkətlərinin mallarını satmaq qadağan edilib.

Siyahıya “Leidos”, “Gibbs&Cox”, “IP Video Market Info”, “Sourcemap”, “Skydio”, “Rapid Flight”, “Red Six Solutions”, “Shield AI”, “HavocAI”, “Neros Technologies”, “Group W”, “Aerkomm”, “General Atomics Aeronautical Systems”, “General Dynamics Land Systems” və “Aero Vironment” şirkətləri daxil edilib.

Daha 10 ABŞ şirkəti isə etibarsız təşkilatlar siyahısına əlavə edilib.