Dövlət agentliyində yüksək vəzifələrə TƏYİNATLAR

Məktəbəqədər və Ümumi Təhsil üzrə Dövlət Agentliyinə yeni direktor müavinləri təyin olunub.

presstvaz   xəbər verir ki, bu barədə Elm və təhsil naziri Emin Əmrullayev əmr imzalayıb.

Belə ki, bu vəzifənin icrası Vəfa Yaqublu və Arslan Hacıyevə həvalə olunub.

Direktor müavini təyin edilən Vəfa Yaqublu müxtəlif dövrlərdə ali təhsil müəssisələrində müəllim, baş müəllim, Elm və Təhsil Nazirliyində baş məsləhətçi, şöbə müdiri vəzifələrində çalışıb.

O, 2022-2024-cü illərdə Azərbaycan Respublikası Elm və Təhsil Nazirliyinin Ümumi və məktəbəqədər təhsildə məzmun, tədris və qiymətləndirmə, Məktəbəqədər və Ümumi Təhsil siyasəti şöbəsinin müdiri vəzifələrində çalışıb.

Qeyd edək ki, Vəfa Yaqublu Azərbaycan Pedaqoji Rus dili və Ədəbiyyatı İnstitutunda Rus dili və ədəbiyyat müəllimliyi üzrə təhsil alıb.

Direktor müavini təyin edilən Arslan Hacıyev 2012-2022-ci illər ərzində bir sıra dövlət qurumlarında müxtəlif rəhbər vəzifələrdə fəaliyyət göstərib.

Elm və təhsil nazirinin müvafiq əmri ilə 2022-cil ildə Qazax-Tovuz Regional Təhsil İdarəsini müdiri vəzifəsinə təyin olunub. 2024-cü ilin noyabr ayından isə Məktəbəqədər və Ümumi Təhsil üzrə Dövlət Agentliyinin Ümumi təhsilin təşkili şöbəsinin müdiri vəzifəsində çalışıb.

Qeyd edək ki, Arslan Hacıyev Azərbaycan Respublikası Prezidenti yanında Dövlət İdarəçilik Akademiyasında təhsil alıb, daha sonra 2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı çərçivəsində Hollandiyanın “Maastricht School of Management” və ADA Universitetində Beynəlxalq Biznes üzrə təhsilini davam etdirib.

Həmçinin, o, 2020-ci ildə Layihələrin idarə edilməsi üzrə beynəlxalq sertifikat (“Project Management Professional” (PMP) əldə edib.