Azərbaycanın Milli Qəhrəmanı Akif Əkbərovun doğum günüdür

Bu gün Azərbaycanın Milli Qəhrəmanı və Birinci Qarabağ müharibəsinin şəhidi Akif Əkbərovun doğum günüdür.

presstvaz   xatırladır ki, Akif Əkbərov 2 fevral 1952-ci ildə Cəbrayıl rayonunun Balyand kəndində dünyaya göz açıb. Məqsədinə çatmaq üçün gərgin və şərəfli bir həyat sürən Akif Əkbərov, son dərəcə vətənpərvər bir insan olaraq, Qarabağ uğrunda döyüşlərdə qəhrəmancasına həlak olub.

Akifin təhsili və ilk iş həyatı sadə, amma məqsədyönlü olub.

1969-cu ildə Beyləqan şəhər 1 saylı orta məktəbini bitirən Akif, 1970-ci ildə Azərbaycan Silahlı Qüvvələrinə xidmətə gedib.

1972-ci ildə ordudan tərxis olunduqdan sonra, 1974-cü ildə Beyləqan rayon Daxili İşlər Şöbəsində polis əməkdaşı kimi fəaliyyətə başlayıb. Akifin polislik karyerası, ona vətəninə xidmət etmə və vətəndaşlarının təhlükəsizliyini təmin etmək imkanı verib. Son olaraq, Dövlət Avtomobil Müfəttişliyi bölməsində Yol-Patrul Xidməti müfəttişi olaraq çalışıb.

Birinci Qarabağ müharibəsi başladıqdan sonra, 1991-ci il avqust ayının 5-də, Akif Əkbərov və digər polis əməkdaşları Kəlbəcər rayonunun “Sarı yer” yaylağına ezam olunurlar. Həmin yaylaq mülki şəxslərin yaşadığı bölgə olduğu üçün, erməni qüvvələri tez-tez bu əraziyə basqınlar edirdilər. Akif və polis yoldaşları yaylaqda əhalinin təhlükəsizliyini təmin etmək üçün mübarizə aparırlar.

12 avqust 1991-ci ildə erməni qüvvələri “Sarı yer” yaylağına hücuma keçirlər. Ön cəbhədə yer alan Akif düşmənin xeyli canlı qüvvəsini məhv edir.

Altı saat çəkən döyüşdə düşmənin gülləsi də ondan yan keçmir və Akif Əkbərov qəhrəmancasına həlak olur.

Akif Əkbərov ölümündən sonra, 8 oktyabr 1992-ci ildə, Azərbaycanın Milli Qəhrəmanı fəxri adına layiq görülüb.