Navalnını öldürən zəhəri onlar hazırlayıb – Adlar və FOTOlar

Rusiyalı müxalifətçi Aleksey Navalnının zəhərlənməsində istifadə edilən epibatidinin analoqlarını istehsal etmək üçün sürətli üsulu "Siqnal" mərkəzinin kimyaçıları hazırlayıblar.

presstvaz xəbər verir ki, 2015-ci ildə Elmlər Akademiyasının xüsusi jurnalında epibatidin analoqlarının sintezi üçün yeni bir mərhələli üsulu təsvir edən məqalə dərc olunub. Bu inkişaf maddənin əvvəlki 70 saat əvəzinə 16 saat ərzində istehsal olunmasına imkan verib. Nəşrin müəllifləri özlərini "Yüksək texnologiyalar laboratoriyası"nın işçiləri kimi təqdim ediblər.

"Agentstvo" nəşri yeddi həmmüəllifdən altısının "Siqnal" tədqiqat mərkəzində işlədiyini müəyyən edib. Onların arasında kimyaçılar İqor Babkin, Sergey Qalan, Georgi Nazarov, Aleksey Aksyonov, Olqa Yudina və Aleksey Lamanov var. Yudina Elm və İstehsalat İdarəsinin 22 nömrəli laboratoriyasında baş elmi işçi vəzifəsində çalışıb, Lamanov isə 23 nömrəli laboratoriyaya rəhbərlik edib. Yeddinci həmmüəllif Radiasiya, Kimya və Bioloji Müdafiə Hərbi Akademiyasının elmi tədqiqat şöbəsinin müdiri polkovnik Mixail Qutsalyuk olub.

Qalan və Nazarov nanokapsullaşdırma – maddənin nanohissəciklərini başqa materialdan hazırlanmış qabıqda qablaşdırmaq texnologiyası üzrə ixtisaslaşıblar. "The Insider" və "Radio Liberty"yə görə, "Siqnal" mərkəzi bu texnologiyanı fəal şəkildə öyrənib. Nanokapsullaşdırma zəhərli maddənin gizlədilməsinə, təsirini gizlətməyə və diaqnozu çətinləşdirməyə imkan verir. Hər iki kimyaçı nanohissəcikləri bədənin müxtəlif toxumalarına, xüsusən də sinir sisteminin hüceyrələrinə dərman çatdırmaq vasitəsi kimi araşdırıblar.

Xatırladaq ki, bu il fevralın 14-də Birləşmiş Krallıq, İsveç, Fransa, Almaniya və Hollandiya hökumətlərin dərc eydiyi birgə hesabatda rusiyalı müxalifətçi lider Aleksey Navalnının neyrotoksin epibatidinlə zəhərləndiyi bildirilib. Nəticə siyasətçinin biomateriallarının bir neçə laboratoriya tərəfindən aparılan təhlillərinin nəticələrinə əsaslanıb. /Musavat.com