Daxili İşlər Nazirliyi qadın namizədlərin xidmətə qəbulu ilə bağlı müsabiqə elan edir

Yetkinlik yaşına çatmayanların işləri üzrə inspektor vəzifələrinə qəbul aparılacaq

Daxili İşlər Nazirliyinin Mətbuat Xidmətindən  presstvaz-a verilən məlumata görə, Azərbaycan Respublikasının Daxili İşlər Nazirliyi Bakı şəhərində yerləşən müvafiq qurumlarında, eləcə də respublikanın şəhər və rayon polis orqanlarında vakant olan yetkinlik yaşına çatmayanların işləri üzrə orta rəis heyəti üzrə inspektor vəzifələrinə qadın namizədlərin xidmətə qəbulunu elan edir.

Müsabiqədə Azərbaycan Respublikasının dövlət ali təhsil müəssisələrini hüquqşünaslıq və pedaqoji ixtisaslar üzrə bitirmiş, yaşı 20–30 aralığında olan, boyu 160 sm-dən yuxarı, özü və yaxın qohumları məhkum olunmamış qadın cinsli Azərbaycan Respublikası vətəndaşları iştirak edə bilərlər.

Bildirilib ki, namizədlərin sağlamlıq vəziyyəti, fiziki hazırlığı və bilik səviyyəsi müəyyən olunmuş normativlər əsasında yoxlanılacaq.

Qeyd olunub ki, müsabiqə zamanı kompüterdə işləmək bacarığı olan, məsuliyyətli və diqqətli, ən azı bir xarici dili sərbəst bilən, həmçinin minimum 3 illik pedaqoji təcrübəsi olan namizədlərə üstünlük veriləcək.

Müsabiqədə iştirak etmək istəyən şəxslər 2026-cı il fevralın 10-dan martın 10-dək Daxili İşlər Nazirliyinin rəsmi internet saytında — www.mia.gov.az ünvanında yerləşdirilmiş elektron ərizə formasını və qısa anket məlumatlarını şəxsən dolduraraq bki@mia.gov.az elektron poçt ünvanına göndərə bilərlər.

📞 Əlavə məlumat üçün əlaqə telefonları:
(012) 590-80-66
(012) 590-98-37
(012) 590-93-64
(012) 590-97-52

Müsabiqə ilə bağlı bütün mərhələlər qanunvericiliyin tələblərinə uyğun və şəffaf şəkildə həyata keçiriləcək.

presstvaz   – Azərbaycanın etibarlı informasiya mənbəyi