Erkən oyanmaq depressiyanın əlamətidir?

Çox vaxt zəngli saatın çalmasından 5-15 dəqiqə əvvəl oyanmaq narahatlıq üçün səbəb deyil, əksinə, yaxşı işləyən bir mexanizmin əlamətidir. Lakin bu, müntəzəm olaraq təkrarlanırsa, o zaman həyəcan siqnalı ola bilər.

presstvaz-ın xəbərinə görə, bu barədə rusiyalı somnoloq və tibb elmləri doktoru Sofiya Çerkasova “Gazeta.ru” nəşrinə müsahibəsində danışıb.

“Bu tip oyanma bədənin bioloji ritmlərinin işləməsi ilə əlaqəlidir. Əgər insan uzun müddət sabit yuxu rejimi ilə yaşayırsa, beyin oyanma vaxtını “yadda saxlayır” və orqanizmi əvvəlcədən tədricən yuxudan oyandırmağa başlayır. Bu, sinxronlaşmış bioritmlərin əlamətidir. Oyandıqdan sonra insan özünü dincəlmiş hiss edir və günə sakit başlayır. Bu halda hər şey qaydasındadır. Lakin həftəiçi ilə həftəsonu günləri arasında fərq var. Həftəiçi günlərdə erkən oyanmaq çox vaxt gözləmə və özünə nəzarət ilə əlaqələndirilir. Həftəsonları isə həmin eyni vaxtda oyanırsınızsa, amma hələ də yatmaq istəmənizə baxmayaraq, artıq yenidən yuxuya gedə bilmirsinizsə, bunun üzərində düşünməyə dəyər. Bu, çox vaxt daxili gərginliyi göstərir. Sinir sistemi yüksək ayıqlıq vəziyyətində qalır”, – deyə Sofiya Çerkasova bildirib.

Həkim bir neçə əsas səbəbi ayırd edib ki, onları gözardı etmək olmaz.

Depressiya. Əgər oyanma hər gün eyni vaxtda baş verərsə və bitkin (depressiv) əhval-ruhiyyə, ümidsizlik hissi və enerji çatışmazlığı ilə müşayiət olunarsa, bu, xüsusi həyəcan siqnalıdır.

Xroniki stres və tükənmə. Orqanizm öz resurslarını tükəndirib və hətta yuxu zamanı belə özünü bərpa etməyi dayandırır.

Hormonal dəyişikliklər. Qalxanvari vəzinin işində pozulmalar və ya dekompensasiya olunmuş diabet yuxunun dərinliyinə və strukturuna təsir göstərə bilər.

Somatik xəstəliklər. Ağrı, narahatlıq və gecə nəfəs darlığı erkən oyanmanın tez-tez rastlanan səbəbləridir.