"Barselona" maaşını azaltmaq istəyir

İspaniya nəhəngi “Barselona” təcrübəli hücumçusu Robert Levandovski ilə əməkdaşlığı davam etdirmək niyyətindədir. Kataloniya klubu 37 yaşlı polşalı futbolçu ilə müqavilənin müddətini daha bir mövsüm artırmağı planlaşdırır.

presstvaz xarici KİV-ə istinadla xəbər verir ki, “Barselona” Levandovskiyə maaşının azaldılması şərti ilə yeni sözləşmə təklif etmə variantını nəzərdən keçirir.

Qeyd olunur ki, komandanın baş məşqçisi Hans-Diter Flik futbolçunun həm intizamından, həm də meydandakı performansından məmnundur. Məhz bu səbəbdən klub rəhbərliyi Levandovskinin müqaviləsini ən azı 2027-ci ilin iyununa qədər uzatmaq üçün müxtəlif imkanları dəyərləndirir.

Xatırladaq ki, Robert Levandovski 2022-ci ilin yayından etibarən “Barselona”nın formasını geyinir. O, cari mövsüm bütün turnirlər üzrə 27 oyunda iştirak edərək 12 qol vurub və 3 məhsuldar ötürmə ilə yadda qalıb. Təcrübəli hücumçunun hazırkı müqaviləsi 2026-cı ilin yayına qədər qüvvədədir. “Transfermarkt” portalının məlumatına görə, Levandovskinin bazar dəyəri 9 milyon avro təşkil edir.